Bhavnagar News: બેફામ કાર ચલાવી બે લોકોના જીવ લેનાર પોલીસ પુત્ર ઝડપાયો, કોર્ટે ઝાટકતા પોલીસે 304ની કલમ ઉમેરી

ગુજરાતમાં નબીરાઓ દ્વારા બેફામ કાર ચલાવતા અનેક અકસ્માતોની ઘટના સામે આવતી હોય છે. આ ઉપરાંત પોલીસ પુત્રો પણ બેખૌફ બનીને કાર ચલાવી અકસ્માતો સર્જાતા હોવાના બનાવો સામે આવે છે. ત્યારે ભાવનગરમાં એક પોલીસ પુત્રએ બેફામ સ્પીડે કાર ચલાવી અકસ્માત સર્જ્યો છે. કાર રેસિંગ કરતા પોલીસ પુત્રએ ત્રણથી ચાર લોકોને અડફેટે લીધા હતાં. જેમાં એક યુવક અને એક વૃદ્ધાનું મોત નિપજ્યું હતું. આ ઘટનામાં પોલીસ પુત્રની ધરપકડ કરવામાં આવી છે.

પોલીસે કારચાલક હર્ષરાજ ગોહિલની ધરપકડ કરી

પ્રાપ્ત વિગતો પ્રમાણે ભાવનગરમાં કાળીયાબીડના શક્તિ માતા મંદિર પાસે કાર ચાલક પોલીસ પુત્ર બેફામ બન્યો હતો.તેણે ત્રણથી ચાર લોકોને અડફેટે લીધા હતાં. આ ઉપરાંત એક બાઈક ચાલકને પણ અડફેટે લેતાં તેનું મોત નિપજ્યું હતું.અકસ્માતની આ ઘટનામાં ત્રણ જેટલી 108 દ્વારા ઇજાગ્રસ્તોને હોસ્પિટલ ખસેડવામાં આવ્યા હતાં.સ્થાનિકોનું કહેવું હતું કે બે કાર વચ્ચે રેસ લગાવી હોવાથી આ અકસ્માત સર્જાયો હતો. આ ઘટનામાં એક વૃદ્ધાનું પણ મોત થયું હોવાનું સામે આવ્યું હતું.

અકસ્માતમાં એક યુવક અને વૃદ્ધાનું મોત થયું હતું

પોલીસે આરોપી પોલીસ પુત્ર હર્ષરાજ ગોહિલની ધરપકડ કરીને તેની સામે સાત વર્ષની નીચેની સજાની કલમ લગાવી હતી. આજે તેને કોર્ટમાં રજૂ કરવામાં આવતા કોર્ટે પોલીસ સામે ફટકાર લગાવી હતી. કોર્ટની ટકોર બાદ આરોપી સામે 304ની કલમ લગાવાઈ હતી. આરોપીએ બેફામ કાર ચલાવીને અકસ્માત સર્જયો હતો. જેમાં એક યુવક અને એક વૃદ્ધાનું મોત નિપજ્યું હતું.