Bhavnagar : બેખોફ તસ્કરો પર પોલીસની લગામ, 3 વર્ષમાં થયેલ ઘરફોડ ચોરીનો ભેદ ઉકેલાયો, LCBએ 5 તસ્કરોને ઝડપી પાડ્યા

ભાવનગરમાં બેખોફ તસ્કરો પર પોલીસની લગામ. શહેર અને જિલ્લામાં તસ્કરો બેફામ બન્યા છે. છેલ્લા ત્રણેક વર્ષની અંદર જિલ્લામાં લૂંટ અને ચોરીના બનાવો વધ્યા હોવાનું સામે આવ્યું છે. પરંતુ બેલગામ બનેલા તસ્કરો પર પોલીસે લગામ લગાવી છે. છેલ્લા કેટલાક વર્ષોમાં ઘરફોડ ચોરીનો ભેદ ઉકેલવામાં પોલીસને સફળતા મળી. અગાઉ ચિત્રા SBI બેન્કમાં 75 લાખની લૂંટમાં ગણતરીના સમયમાં જ 3આરોપીઓને ઝડપી પાડ્યા હતા.  ટેકનોલોજી અને બાતમીદારોની મદદથી પોલીસને તસ્કરોને ઝડપી પાડવામાં મદદ મળે છે.

પોલીસે 5 તસ્કરોને ઝડપી પાડ્યા

જિલ્લામાં ત્રણેક વર્ષના સમયગાળા દરમ્યાન થયેલ ઘરફોડ ચોરીનો ભેદ ઉકેલાયો. તાજેતરમાં સરદાર પટેલ, જ્ઞાનમંજરી, ઓજ અને નૈમિષારણ્ય સહિતની કોલેજમાં થયેલ ચોરી તેમજ જિલ્લામાં સિહોર, વરતેજ અને માઢીયા ગામ મળી કુલ 7 જેટલી જગ્યાઓ ઉપર ચોરીની ઘટના બનવા પામી હતી. LCB ની ટિમે ઘરફોડ ચોરી કરનાર 5 તસ્કરોને ઝડપી એક લાખ ઉપરાંતના સોના ચાંદીના ઘરેણાં પણ કબ્જે કર્યા છે. પોલીસને મળેલ આ મુદામાલ ચોરી મામલે કરવામાં આવેલ ફરિયાદના આધારે અરજદારને પરત કરાશે.

ફરાર તસ્કરોને શોધવા કવાયત

ભાવનગર ની LCB ની ટિમ દ્વારા આ 5 તસ્કરો ને ઝડપી સોના ચાંદીના ઘરેણાંઓ સાથે 132350 નો મુદ્દામાલ કબ્જે કર્યો છે. આ ચોરીના ગુનામાં ફરાર ચાર શખસોને ઝડપી લેવા LCBની ટિમે પોતાના ચક્રો ગતિમાન કર્યા છે. તસ્કરો ગમે ત્યાં છુપાયા હશે પરંતુ પોલીસની બાજનજરથી છટકી શકશે નહી. કહેવાય છે કે 'ચોરની ચાર આંખ હોય છે' પરંતુ પોલીસ પણ આવા ચાર આંખવાળા ચોરની પણ બાપ છે. બેખોફ બનેલા તસ્કરોને પકડવા આકાશ-પાતાળ એક કરી ગમે ત્યારે જેલ ભેગા કરશે. અગાઉ સિંધુનગર વિસ્તારમાં ચોરીની ઘટના તેમજ ભેંસોની ચોરીની ઘટનામાં આરોપીઓને ગણતરીના સમયમાં ઝડપી પાડ્યા હતા.