છોટાઉદેપુર જિલ્લાના બોડેલી પંથકમાં કાયદાના ધજાગરા ઉડાડતો અને વિચિત્ર બનાવ સામે આવ્યો છે. પોલીસને બાતમી મળતા પોલીસે દારૂ ભરેલી એક કારનો પીછો શરૂ કર્યો હતો. પોલીસના ડરથી બુટલેગરે પોતાની કારને બેફામ રીતે દોડાવતા, તેણે રોડ પર એક બાઇક અને અન્ય કારને અડફેટે લીધી હતી, જેના કારણે કારનો ગંભીર અકસ્માત થયો હતો. અકસ્માત બાદ કારમાં સવાર બે બુટલેગર પૈકી એક બુટલેગર તાત્કાલિક સ્થળ પરથી ફરાર થઈ ગયો હતો, જ્યારે બીજા બુટલેગરને પોલીસે ઝડપી પાડ્યો હતો. આ ઘટનામાં કેટલાક લોકોને ઈજા પણ પહોંચી હતી, પરંતુ મુખ્ય બનાવ તો કારમાં ભરેલા દારૂને લઈને બન્યો.
અકસ્માત બાદ દારૂની લૂંટની શરમજનક ઘટના
બુટલેગરની કાર પલટી ખાતાં કારમાં ભરેલો મોટા પ્રમાણમાં વિદેશી દારૂ રોડ પર વેરવિખેર થઈ ગયો હતો. આ દારૂ જોઈને સ્થળ પર હાજર લોકોએ શરમ અને કાયદાનો ડર મૂકીને દારૂની બોટલો લેવા માટે પડાપડી કરી હતી. લોકોએ જાણે કે મફતનો માલ મળ્યો હોય તેમ તૂટી પડ્યા હતા અને ગણતરીની મિનિટોમાં જ દારૂની અનેક બોટલો લૂંટીને ફરાર થઈ ગયા હતા. પોલીસની હાજરી હોવા છતાં લોકોએ દારૂની લૂંટ ચલાવતા ગુજરાતમાં દારૂબંધીના નિયમોના ધજાગરા ઉડ્યા હતા. આ ઘટનાએ સાબિત કર્યું છે કે કાયદાનો ડર ભૂલીને લોકો કેવી રીતે લૂંટ જેવી શરમજનક પ્રવૃત્તિમાં જોડાઈ શકે છે.
