Junagadh News: પિતાએ 10 વર્ષની દીકરી પર દુષ્કર્મ આચર્યું, બાળકીએ મદદ માગતા પાડોશીએ પણ હવસનો શિકાર બનાવી

જૂનાગઢ શહેરમાં એક હૃદયદ્રાવક અને ચોંકાવનારી ઘટના પ્રકાશમાં આવી છે. જેણે સમાજને શરમજનક સ્થિતિમાં મૂકી દીધો છે.એક નરાધમ પિતાએ પોતાની 10 વર્ષની માસૂમ દીકરીને પાંચ વર્ષ સુધી હવસનો શિકાર બનાવી હોવાનો કિસ્સો પોલીસ દફ્તરે નોંધાયો છે.આ ઘટના એટલી ગંભીર છે કે જ્યારે 15 વર્ષની આ તરુણીએ મદદ માટે પડોશી શખ્સનો સંપર્ક કર્યો ત્યારે તે શખ્સે પણ તેની નિર્દોષતાનો લાભ લઈ બળાત્કાર ગુજાર્યો હતો.આ ઘટનાએ સમગ્ર વિસ્તારમાં ચકચાર મચાવી દીધી છે.

તરુણીએ મદદ માગી તો પડોશીએ પણ ગુજાર્યો બળાત્કાર

પોલીસ રિપોર્ટ અનુસાર સગીરાની માતા માનસિક રીતે અસ્વસ્થ છે અને તેની બે બહેનોમાંથી એક બહેન મામાના ઘરે રહે છે.આ એકલતાનો લાભ લઈને હવસખોર પિતાએ પોતાની 10 વર્ષની દીકરી પર પહેલીવાર દુષ્કર્મ ગુજાર્યું અને ત્યારથી સતત પાંચ વર્ષ સુધી આ કુકર્મ ચાલુ રાખ્યું હતું. હાલ 15 વર્ષની સગીરાએ હિંમત દાખવી અને પોતાના પિતાની કરતૂતની જાણ પડોશમાં રહેતા એક શખ્સને કરી પરંતુ તે શખ્સે મદદ કરવાને બદલે સગીરા પર બળાત્કાર ગુજાર્યો હતો.

જૂનાગઢ પોલીસે બંને આરોપીઓને રાઉન્ડઅપ કર્યા

આ ઘટના 181 હેલ્પલાઇનના ધ્યાને આવતાં તેમણે તાત્કાલિક પગલાં લીધાં છે. પોલીસે સગીરાનું કાઉન્સેલિંગ કરી તેનું નિવેદન નોંધ્યું અને પિતા તેમજ પડોશી શખ્સ સામે પોક્સો એક્ટ સહિતની સંબંધિત કલમો હેઠળ ગુનો દાખલ કર્યો હતો. તાલુકા પોલીસે ઝડપી કાર્યવાહી કરીને બંને આરોપીઓને હસ્તગત કરી લીધા છે અને વધુ તપાસ હાથ ધરી છે.આ ઘટનાએ સમાજમાં રહેલી નૈતિકતાની ખોટ અને સગીર બાળકોની સુરક્ષાનો ગંભીર પ્રશ્ન ઉભો કર્યો છે.