Kachchh News: ભુજની રેજન્ટા હોટલમાં અધિકારીઓ અને પૂર્વ અધિકારીઓ જુગાર રમતા ઝડપાયા

ગુજરાતમાં એક તરફ શ્રાવણ માસના તહેવારોની ઉજવણી ચાલી રહી છે. બીજી બાજુ શ્રાવણિયા જુગારની પણ મોસમ ખીલી ઉઠી છે. નાના જુગારીયા તો પોલીસના હાથે ઝડપાઈ રહ્યાં છે પણ હાઈ પ્રોફાઈલ લોકો પણ જુગાર રમતા પકડાયા છે. કચ્છ જિલ્લામાં પોલીસે હાઈ પ્રોફાઈલ જુગારધામ ઝડપી પાડ્યું છે. ભુજની રેજન્ટા હોટેલમાં ચાલી રહેલા જુગારધામ પર પોલીસે રેડ કરતા ખળભળાટ મચી જવા પામ્યો હતો.

ભુજની રેજન્ટા હોટલમાં જુગારધામ પર પોલીસના દરોડા

પ્રાપ્ત વિગતો પ્રમાણે શ્રાવણ માસમાં લોકો જુગાર રમતા હોવાથી આ પ્રવૃત્તિને રોકવા માટે પોલીસ સક્રિય થઈ ગઈ છે. કચ્છ જિલ્લામાં ભુજની રેજન્ટા હોટેલમાં હાઈ પ્રોફાઈલ જુગાર ધામ ચાલી રહ્યું હતું. જુગારની જામેલી મહેફિલમાં પોલીસ ત્રાટકી હતી. પોલીસે દરોડા પાડીને હાઈ પ્રોફાઈલ જુગારધામ ઝડપાયું હતું. આ જુગારધામમાં અધિકારીઓ અને પૂર્વ અધિકારીઓ ઝડપાયા હતાં.

અધિકારીઓ અને પૂર્વ અધિકારીઓ જુગાર રમતા ઝડપાયા

પોલીસે દરોડો પાડતા ઝડપાયેલા ખેલીઓમાં પૂર્વ નિવૃત્ત DDO, R&Bના ત્રણ ઈજનેરો અને નિવૃત્ત અધિક્ષક ઈજનેર હોવાની ચર્ચાએ જોર પકડ્યું છે. આ જુગારધામમાં જુગારની સાથે દારૂની મહેફિલ પણ ચાલતી હોવાનું સુત્રો દ્વારા જાણવા મળ્યું હતું. પોલીસે દરોડા પાડીને મહેફિલમાં ભંગ પાડ્યો હતો અને 15.84 લાખના મુદ્દામાલ સાથે ખેલીઓને ઝડપી પાડ્યા હતાં.