Rajkot : કોર્ટના નિવૃત કલાર્ક સાથે લાખોની છેતરપિંડી કરનારા 3 લોકો ઝડપાયા

રાજ્યમાં છેતરપિંડીની કેસમાં સતત વધારો જોવા મળી રહ્યો છે. તેમાં પણ ખાસ કરીને હાલમાં ડિજિટલ પેમેન્ટના ઓપ્શનમાં વધારો થયા બાદ છેતરપિંડીના કેસોમાં પણ વધારો થયો છે. ત્યારે રાજકોટમાં પણ આવો જ એક કેસ સામે આવ્યો છે. કોર્ટના નિવૃત કર્લાકને ડિજિટલ એરેસ્ટ કરીને રૂપિયા 88.50 લાખ રૂપિયા પડાવી લેવામાં આવ્યો છે. રાજકોટના દિનેશ દેલવાડીયા ડિજિટલ અરેસ્ટનો ભોગ બન્યા છે. આ અંગે સાયબર ક્રાઈમ પોલીસમાં ફરિયાદ નોંધાઈ હતી અને ફરિયાદના આધારે પોલીસે 3 આરોપીઓને દબોચી લીધા છે.

સાયબર ક્રાઈમ પોલીસે 3 લોકોને દબોચ્યા

તમને જણાવી દઈએ કે સાયબર ક્રાઈમ પોલીસે બ્રિજેશ પટેલ, મોહસીન અને શોએબ નામના શખ્સોની અટકાયત કરી છે. આ અંગે સાયબર ક્રાઈમના એસીપી ચિંતન પટેલે જણાવ્યું કે CBIના નામે આરોપીઓએ ફરિયાદી દિનેશ દેલવાડીયાને 8 જુલાઈના રોજ વોટસએપ પર કોલ કર્યો હતો. બેન્ક ચિટિંગના 10 ટકા રકમ તમારા ખાતામાં જમા થયાનું કહી ડિજિટલ એરેસ્ટ કરવામાં આવ્યા હતા. આ કેસમાં 12 રાજ્યના 8 અલગ અલગ એકાઉન્ટનો ઉપયોગ કરવામાં આવ્યો છે. ભાવનગરના બ્રિજેશ પટેલના એકાઉન્ટમાં રૂપિયા 10 લાખ નાખવામાં આવ્યા, જેનું તેને કમિશન પણ ચુકવવામાં આવ્યું છે.

આરોપીએ આખા પરિવારની ધરપકડ કરાવવાની ધમકી આપી

વધુમાં ACPએ કહ્યું કે ફરિયાદી દિનેશભાઈએ લોકરમાં રાખેલા પોતાના ઘરેણા પણ ગીરવે મૂકી રકમ જુદા જુદા એકાઉન્ટમાં ટ્રાન્સફર કરી આપી છે. ડીજિટલ એરેસ્ટ કરનાર શખ્સે કહ્યું હતું કે કોઈને જાણ કરશો તો આખા પરિવારની ધરપકડ થશે. તેથી ગભરાઈ જઈને તેમને અગાઉ પોલીસને જાણ કરી નહતી. જો કે 88.50 લાખ રૂપિયા ટ્રાન્સફર કર્યા બાદ આરોપીનો સંપર્ક ન થતાં ફરિયાદીને ફ્રોડ થયાનું જણાયું હતું અને ત્યારબાદ તેમને પોલીસને ફરિયાદ કરી હતી.