રાજકોટમાં છેલ્લા 10 વર્ષથી આતંક મચાવનારી કુખ્યાત 'પેંડા ગેંગ' વિરુદ્ધ પોલીસે કડક વલણ અપનાવ્યું છે. ક્રાઇમ બ્રાન્ચે ગેંગના 11 સભ્યોને એકસાથે કોર્ટમાં રજૂ કર્યા હતા. આ ટોળકી સામે ગુજસીટોક (ગુજરાત કંટ્રોલ ઓફ ટેરરિઝમ એન્ડ ઓર્ગેનાઇઝ્ડ ક્રાઇમ એક્ટ) હેઠળ ગુનો દાખલ કરવામાં આવ્યો છે, જે રાજકોટમાં પ્રથમ વખત બન્યું છે કે આટલી મોટી સંખ્યામાં ગુનેગારોને એકસાથે આ કાયદા હેઠળ કોર્ટમાં રજૂ કરાયા હોય. કોર્ટે હાલમાં 11 સભ્યોને જ્યુડિશિયલ કસ્ટડીમાં મોકલી આપ્યા છે.
71 ગંભીર ગુનાઓ અને ગેંગનો દસ વર્ષનો આતંક
આ પેંડા ગેંગે રાજકોટમાં દસ વર્ષના ગાળામાં ફાયરિંગ સહિતના કુલ 71 જેટલા ગંભીર પ્રકારના ગુનાઓ આચર્યા છે. આ ટોળકીનો મુખ્ય સૂત્રધાર રાજપાલસિંહ જાડેજા હાલમાં જેલમાં બંધ છે, છતાં ગેંગની ગતિવિધિઓ ચાલુ હતી. પોલીસે આ મામલામાં કુલ 17 સભ્યોની ટોળકીને પકડી પાડી છે, જેમાં 4 સભ્યો પોલીસ કસ્ટડીમાં છે અને અન્ય 2 આરોપીઓ હજુ પણ ફરાર છે. સંગઠિત ગુનાખોરીને જડમૂળથી નાબૂદ કરવાના ભાગરૂપે આ કાર્યવાહી કરવામાં આવી છે.
