સુરત શહેરમાં વૃદ્ધ મહિલાઓને છેતરપિંડીનો શિકાર બનાવતી ગડ્ડી ગેંગના મુખ્ય ભેજાબાજ મનોજ બાવરીને ચોક બજાર પોલીસે ઝડપી પાડ્યો છે. આ ધરપકડ સાથે પોલીસે ગેંગના ચાર સભ્યોને જેલના સળિયા પાછળ ધકેલી દીધા છે. આ ઘટના સુરતના ચોક બજાર વિસ્તારમાં બની હતી. જેમાં એક વૃદ્ધ મહિલાને ગડ્ડી ગેંગના ત્રણ પુરુષ અને એક મહિલા સભ્યએ નિશાન બનાવી હતી.
મહિલાને કાગળની ગડ્ડી બતાવી પકડાવી કરી હતી લૂંટ
આ ગેંગે મહિલાને કાગળની એક ગડ્ડી બતાવી હતી. જેના ઉપરના ભાગમાં સાચી ચલણી નોટો હતી અને અંદર કાગળના ટુકડા હતા. આરોપીઓએ આ ગડ્ડીમાં મોટી રકમ હોવાનું જણાવી વૃદ્ધ મહિલાને લલચાવી હતી. આરોપીઓએ વૃદ્ધ મહિલાને વિશ્વાસમાં લઈ તેમને આ કાગળની ગડ્ડી પકડાવી હતી. ત્યારબાદ તેમની પાસેથી સોનાની ચેન અને કાનની બુટ્ટી ઉતરાવીને ફરાર થઈ ગયા હતા.
