વડોદરાના આજવા રોડ વિસ્તારમાં આવેલી રઘુકુળ સ્કૂલમાં વિદ્યાર્થીઓ વચ્ચે મારામારીની ઘટના સામે આવી છે. ધોરણ 9ના વિદ્યાર્થીએ મોબાઈલ લાવવા બાબતે શિક્ષકને જાણ કરનાર અન્ય વિદ્યાર્થીના માથામાં લોખંડનું કડુ મારી દેતા ગંભીર ઈજા પહોંચી હતી. ઈજાગ્રસ્ત વિદ્યાર્થીના પિતાએ આ મામલે કડક કાર્યવાહીની માંગ કરી છે, જ્યારે સ્કૂલ ટ્રસ્ટીએ કડુ મારનાર વિદ્યાર્થી પાસે માફીપત્ર લખાવી મામલો થાળે પાડવાનો પ્રયાસ કર્યો છે. આ ઘટનાએ વાલીઓ અને શૈક્ષણિક વર્તુળોમાં ચિંતા જગાડી છે અને સ્કૂલોમાં શિસ્તના અભાવ અંગે સવાલો ઉભા કર્યા છે.
હુમલાનું કારણ અને ટ્રસ્ટીનું નિવેદન
આ ઘટનાની શરૂઆત મોબાઈલ ફોનને લઈને થઈ હતી. કડુ મારનાર વિદ્યાર્થી સ્કૂલમાં મોબાઈલ લઈને આવ્યો હતો, જેની જાણ ઈજાગ્રસ્ત વિદ્યાર્થીએ શિક્ષકને કરી હતી. શિક્ષક જ્યારે મોબાઈલ ચેક કરવા આવ્યા, ત્યારે મોબાઈલ લાવનાર વિદ્યાર્થીએ આ વાતની જાણ કેમ કરી તે પૂછીને અન્ય વિદ્યાર્થી પર હુમલો કર્યો. આ હુમલામાં તેણે પોતાના હાથમાં પહેરેલું કડુ માથામાં મારી દીધું, જેનાથી વિદ્યાર્થીને ગંભીર ઈજા થઈ. આ મામલે રઘુકુળ સ્કૂલના ટ્રસ્ટી પ્રશાંત શાહે નિવેદન આપતા જણાવ્યું કે, હુમલો કરનાર વિદ્યાર્થી પાસે માફીપત્ર લખાવવામાં આવ્યું છે અને તેને ચેતવણી આપવામાં આવી છે. જોકે, ઈજાગ્રસ્ત વિદ્યાર્થીના પિતા આ કાર્યવાહીથી સંતુષ્ટ નથી.
