Dwarka News: 29 જુલાઈથી 26 સપ્ટેમ્બર સુધી 21 ટાપુઓ પર પ્રવેશ પ્રતિબંધ

દેવભૂમિ દ્વારકા જિલ્લામાં પશ્વિમ આંતરરાષ્ટ્રીય સરહદે આવેલ 21 નિર્જન ટાપુઓ પર 29 જુલાઈથી 26 સપ્ટેમ્બર 2025 સુધી જિલ્લા પ્રશાસન દ્વારા પ્રવેશ પર પ્રતિબંધ ફરમાવાયો છે. જિલ્લામાં કુલ 24 ટાપુઓમાંથી 2 ટાપુઓમાં માનવ વસાહત છે જ્યારે 22 ટાપુ નિર્જન છે. નરારા ટાપુને છૂટ આપતાં બાકીના 21 ટાપુઓ માટે પૂર્વ મંજૂરી વગર પ્રવેશ પર પ્રતિબંધ મુકવામાં આવ્યો છે.

આ ટાપુઓ પર પ્રતિબંધ ફરમાવવામાં આવ્યો

આ ટાપુઓ ધાર્મિક અને અન્ય પ્રસંગોએ શ્રદ્ધાળુઓ તેમજ વિશિષ્ટ પ્રવૃત્તિઓ માટે ઉપયોગમાં લેવાતા હોય છે. રાષ્ટ્રવિરોધી તત્વો દાણચોરી, હથિયાર કે નશીલા પદાર્થો છુપાવવાની શકયતા હોય તે કારણે જનસલામતી માટે આ પગલાં લેવામાં આવ્યું છે.પ્રતિબંધિત ટાપુઓમાં ધાની, ગાંધીયોકડો, કાલુભાર, રોઝી, પાનેરો, ગડુ, ખીમરોઘાટ, આશાબાપીર, ચાંક, ધબધબો, દીવડી, સામિયાણી, નોરૂ, માન-લેફા-લંધા મરૂડી વગેરે ટાપુઓનો સમાવેશ થાય છે.

ટાપુઓ પર પ્રવેશ માટે લેખિત મંજૂરી ફરજિયાત

દ્વારકામાં તાજેતરમાં જ કેટલાક ટાપુઓ પર ગેરકાયદે ખડકાયેલા દબાણો દૂર કરવામાં આવ્યા હતાં. આ ટાપુઓ પર દાણચોરી. નશીલા પદાર્થોની હેરાફેરી અને દેશ વિરોધી પ્રવૃત્તિઓને અંજામ આપવામાં આવતો હોવાની માહિતીને આધારે તંત્ર દ્વારા પ્રવેશ પર પ્રતિબંધ ફરમાવાયો છે. જાહેરનામું મુજબ આ ટાપુઓ પર પ્રવેશ માટે તે વિસ્તારના પ્રાંત અધિકારી અથવા સબ-ડિવિઝનલ મેજિસ્ટ્રેટની લેખિત મંજૂરી ફરજિયાત રહેશે.