ગીર સોમનાથ જિલ્લાના કોડીનાર શહેરના ઉના ઝાંપા વિસ્તારમાં આજે બે સ્થાનિક પરિવારો વચ્ચે મામૂલી વાતને લઈને ગંભીર બબાલ થતાં ચકચાર મચી ગઈ છે. આ વિવાદમાં બંને પરિવારોના કુલ ચાર સભ્યોને ઈજા પહોંચી છે. જેમને હોસ્પિટલમાં દાખલ કરવા પડ્યા છે. આ બબાલનું મૂળ કારણ મકાન નજીકનો જાહેર રસ્તો હતો. બંને પરિવારો વચ્ચે આ રસ્તાના ઉપયોગ અને સીમાને લઈને છેલ્લા કેટલાક સમયથી તણાવ ચાલી રહ્યો હતો.
મકાન નજીક રસ્તાને લઈને બંને પરિવારો વચ્ચે વિવાદ
આજે આ વિવાદે ઉગ્ર સ્વરૂપ ધારણ કર્યું હતું અને બંને પક્ષો આમને-સામને આવી ગયા હતા. વાતચીતથી શરૂ થયેલી ચર્ચા થોડી જ વારમાં હિંસક અથડામણમાં ફેરવાઈ ગઈ હતી. ઝઘડામાં થયેલી મારામારીના કારણે બંને પરિવારોના બે-બે સદસ્યોને ઈજા પહોંચી હતી. ઈજાગ્રસ્તોને તાત્કાલિક સારવાર માટે નજીકની હોસ્પિટલમાં દાખલ કરવામાં આવ્યા છે. પોલીસે ઘટનાની જાણ થતાં જ સ્થળ પર પહોંચીને પરિસ્થિતિને કાબૂમાં લીધી હતી.
