Gondal News: અનિરુદ્ધસિંહના પેટ્રોલ પંપ પર ફાયરિંગ કરનાર મુખ્ય આરોપીની પોલીસે કરી ધરપકડ

રીબડાના અનિરુદ્ધસિંહ જાડેજાના પેટ્રોલ પંપ પર થયેલા ફાયરિંગના કેસમાં મુખ્ય આરોપી હાર્દિકસિંહ જાડેજાની ગોંડલ તાલુકા પોલીસે ધરપકડ કરી હતી. આ મામલો સમગ્ર સૌરાષ્ટ્રમાં ચર્ચાનો વિષય બન્યો હતો અને હવે પોલીસ કાર્યવાહીમાં વેગ આવ્યો છે. હાર્દિકસિંહ જાડેજા સુરત પોલીસની કસ્ટડીમાં હતો. ગોંડલ પોલીસે સુરત કોર્ટમાંથી ટ્રાન્ઝિટ વોરંટ મેળવીને તેનો કબ્જો મેળવ્યો હતો. ત્યારબાદ તેને ગોંડલ લાવીને કોર્ટમાં રજૂ કરવામાં આવ્યો હતો.

હાર્દિકસિંહ જાડેજાની ગોંડલ તાલુકા પોલીસે કરી ધરપકડ

પોલીસે કોર્ટમાં આરોપીના વધુ રિમાન્ડની માંગણી કરી હતી. જેથી ઘટનાની ઊંડાણપૂર્વક તપાસ કરી શકાય. પોલીસની દલીલો સાંભળ્યા બાદ ગોંડલ કોર્ટે હાર્દિકસિંહ જાડેજાના ચાર દિવસના રિમાન્ડ મંજૂર કર્યા હતા. આ સમયગાળા દરમિયાન પોલીસ હાર્દિકસિંહની સઘન પૂછપરછ કરશે. પોલીસને આશા છે કે આ પૂછપરછમાં ફાયરિંગ પાછળનું સાચું કારણ અને તેમાં સામેલ અન્ય લોકો અને ગુનામાં ઉપયોગમાં લેવાયેલા હથિયાર અંગે મોટા ખુલાસા થઈ શકે છે.

ગોંડલ કોર્ટે ચાર દિવસના રિમાન્ડ કર્યા મંજૂર

આ ઘટનાએ રાજકીય અને સામાજિક વર્તુળોમાં ભારે ચર્ચા જગાવી હતી. પોલીસે આ મામલે ઝડપી કાર્યવાહી કરીને મુખ્ય આરોપીની ધરપકડ કરી હતી. જે કાયદાનું શાસન જાળવવા માટે એક મહત્વનું પગલું છે. હવે રિમાન્ડ દરમિયાન થનારી પૂછપરછ પર સૌની નજર રહેશે.