Rajkot News : VHP પ્રમુખ પિયુષ રાદડિયાનું રાજીનામું, જયરાજસિંહ જાડેજા પર કર્યા ગંભીર આરોપ

ગોંડલ VHP પ્રમુખ પિયુષ રાદડિયા (Piyush Radadiya) એ પોતાના પદ પરથી રાજીનામું આપીને ગોંડલના પૂર્વ MLA જયરાજસિંહ જાડેજા પર ગંભીર આરોપો લગાવ્યા છે. રાદડિયાએ જાડેજા પર માત્ર VHP ના હોદ્દેદારો અને કાર્યકર્તાઓને જ નહીં, પરંતુ તેમની સાથે રહેતા અન્ય લોકોને પણ હેરાન કરવાનો આરોપ મૂક્યો છે. આ આરોપોમાં ધંધાકીય ક્ષેત્રે પણ હેરાનગતિ કરવામાં આવતી હોવાનો દાવો કરવામાં આવ્યો છે. આ ઘટનાએ ગોંડલના રાજકીય અને સામાજિક વર્તુળોમાં ભારે ચર્ચા જગાવી છે.

પિયુષ રાદડિયાનું નિવેદન

પિયુષ રાદડિયાએ જણાવ્યું કે, જયરાજસિંહ જાડેજાની હેરાનગતિથી કંટાળીને તેમણે આ પગલું ભર્યું છે. તેમણે કહ્યું કે, છેલ્લા કેટલાક સમયથી VHP ના કાર્યકર્તાઓ અને હોદ્દેદારોને હેરાન કરવામાં આવતા હતા, જેના કારણે સંગઠનનું કામ કરવું મુશ્કેલ બની રહ્યું હતું. આ ઉપરાંત, રાદડિયાએ એવો પણ આરોપ લગાવ્યો કે તેમના સમર્થકો અને તેમની સાથે સંકળાયેલા લોકોને પણ વ્યવસાયિક રીતે હેરાન કરવામાં આવતા હતા. આ પ્રકારના દબાણ અને હેરાનગતિને કારણે સંગઠન અને સમાજ માટે કામ કરવું અશક્ય બન્યું હોવાનું તેમણે જણાવ્યું.

જયરાજસિંહ જાડેજા તરફથી કોઈ પ્રતિક્રિયા આવી નથી

પિયુષ રાદડિયાના આ રાજીનામા અને ગંભીર આરોપો બાદ જયરાજસિંહ જાડેજા કે તેમના સમર્થકો તરફથી હજુ સુધી કોઈ સત્તાવાર પ્રતિક્રિયા આવી નથી. જોકે, આ સમગ્ર ઘટનાએ ગોંડલમાં VHP અને ભાજપ (BJP) વચ્ચેના સંબંધોમાં તણાવ ઊભો કર્યો હોવાનું મનાઈ રહ્યું છે. રાદડિયાના રાજીનામાથી VHP ના કાર્યકર્તાઓમાં પણ નારાજગી જોવા મળી રહી છે. હવે જોવાનું એ રહે છે કે આ ઘટના બાદ જયરાજસિંહ જાડેજા કે VHP નું મોવડી મંડળ કઈ રીતે આ મુદ્દાને સંભાળે છે અને આગળ શું પગલાં લેવામાં આવે છે.