Jamnagar News: ધ્રોલ નજીક બે કાર વચ્ચે ટક્કર, અકસ્માતમાં ત્રણના મોત, છ ઘાયલ

જામનગર જિલ્લાના ધ્રોલ તાલુકામાંથી ગમખ્વાર અકસ્માતની ઘટના સામે આવી છે. ધ્રોલના લતીપર ગામ પાસે હાઈવે પર પૂરપાટ ઝડપે આવી રહેલી બે કાર વચ્ચે સામસામે ટક્કર થઈ હતી. આ ગોઝારા અકસ્માતનો અવાજ એટલો પ્રચંડ હતો કે, આસપાસના સ્થાનિક લોકો અને વાહનચાલકો તાત્કાલિક ઘટના સ્થળે દોડી આવ્યા હતા. અકસ્માતને પગલે હાઈવે પર ટ્રાફિક જામના દ્રશ્યો સર્જાયા હતા.

ભયાનક ટક્કરમાં 3 લોકોના મોત

આ ભયાનક અકસ્માત એટલો જોરદાર હતો કે, બંને કારના કુરચે-કુરચા બોલી ગયા હતા. કારમાં સવાર મુસાફરોમાંથી 3 લોકોના ઘટના સ્થળે જ શ્વાસ રૂંધાઈ જવાના કારણે અને ગંભીર ઇજાઓ થવાના કારણે કમકમાટીભર્યા કરૂણ મોત નીપજ્યા હતા. આ ઉપરાંત, બંને વાહનોમાં સવાર અન્ય 6 જેટલા લોકોને નાની-મોટી અને ગુપ્ત ગંભીર ઇજાઓ પહોંચતા તેઓ લોહીલુહાણ હાલતમાં કારમાં ફસાઈ ગયા હતા, જેમને સ્થાનિક લોકોએ ભારે જહેમત બાદ બહાર કાઢ્યા હતા.

મૃતદેહો ધ્રોલ હોસ્પિટલ અને ઇજાગ્રસ્તોને જામનગર જીજી હોસ્પિટલ ખસેડાયા

ઘટનાની જાણ થતાં જ પોલીસ કાફલો અને 108 એમ્બ્યુલન્સની ટીમ ઘટના સ્થળે દોડી ગઈ હતી. પોલીસે તાત્કાલિક કાર્યવાહી કરીને ત્રણેય મૃતકોના મૃતદેહને પોસ્ટ મોર્ટમ અર્થે ધ્રોલની સરકારી હોસ્પિટલ ખાતે ખસેડ્યા હતા. જ્યારે ગંભીર રીતે ઘવાયેલા તમામ 6 ઇજાગ્રસ્તોને વધુ સારવાર માટે તાત્કાલિક જામનગરની પ્રખ્યાત જીજી હોસ્પિટલ ખાતે ખસેડવામાં આવ્યા છે. અકસ્માતના પગલે હાઈવે પર ટ્રાફિક જામના દ્રશ્યો સર્જાયા હતા, જેને પોલીસે હળવો કરાવી અકસ્માતનો ગુનો નોંધી આગળની કાયદેસરની તપાસ હાથ ધરી છે.

આ પણ વાંચો - Jamnagarમાં દબાણ હટાવતી એસ્ટેટ ટીમ પર પથ્થરમારો અને મરચાના સ્પ્રે વડે હુમલો