Junagadhમાં પૂર વચ્ચે હિંસક પ્રાણીઓની દહેશત, બાલાગામ-ખેડા પંથકમાં દીપડાનો વીડિયો થયો વાયરલ

જૂનાગઢ જિલ્લામાં ભારે વરસાદ અને પૂરની સ્થિતિએ જનજીવનને તો અસર કરી જ છે પરંતુ હવે હિંસક પ્રાણીઓની દહેશતે લોકોમાં ભયનો માહોલ ફેલાવ્યો છે. બાલાગામ-ખેડા પંથકમાં પૂરગ્રસ્ત વિસ્તારમાં એક દીપડો દેખાયો હોવાનો વીડિયો વાયરલ થયો હતો. જેના કારણે ગ્રામજનોમાં ગભરાટ ફેલાયો હતો. વાયરલ થયેલા આ વીડિયોમાં સ્પષ્ટ જોઈ શકાય છે કે એક દીપડો પાણીથી ઘેરાયેલા વિસ્તારમાં એક દિવાલ પર બેઠેલો છે.

પૂરગ્રસ્ત વિસ્તારમાં દીપડો દેખાતા ગભરાટ

ચારેબાજુ પાણી હોવાને કારણે દીપડાને બહાર નીકળવાનો રસ્તો મળતો નથી. જેના કારણે તે ફસાઈ ગયો હોય તેવું લાગી રહ્યું છે. આ દૃશ્ય જોઈને સ્થાનિકોમાં એક તરફ પૂરની આફત અને બીજી તરફ હિંસક પ્રાણીના ભયને કારણે ચિંતાનું વાતાવરણ સર્જાયું હતું. વન વિભાગના અધિકારીઓએ આ વીડિયોની પુષ્ટિ કરતા જણાવ્યું હતું કે પૂરના કારણે જંગલ વિસ્તારના પ્રાણીઓ સુરક્ષિત જગ્યાની શોધમાં માનવ વસાહતો તરફ આવી રહ્યા છે.

એક તરફ પાણી બીજી તરફ હિંસક પ્રાણી

આ દીપડાના આંટાફેરાથી લોકોમાં ભયનો માહોલ હતો. ગ્રામજનોને સાવચેત રહેવા અને રાત્રે બહાર ન નીકળવા માટે સૂચના આપવામાં આવી હતી. આ ઘટનાએ ફરી એકવાર કુદરતી આફતો દરમિયાન માનવ અને વન્યજીવનના સંઘર્ષની વાસ્તવિકતા ઉજાગર કરી હતી. તંત્ર દ્વારા દીપડાને સુરક્ષિત રીતે પકડી પાડીને જંગલ વિસ્તારમાં પરત મોકલવા માટેની કામગીરી કરવામાં આવે તેવી લોકો માગં કરી રહ્યા છે.