Junagadh News : વંથલીમાં ધોધમાર વરસાદથી રસ્તાઓ નદી બન્યા, ખેડૂતોએ વાવણીની તૈયારીઓ શરૂ કરી

જૂનાગઢ જિલ્લાના વંથલી પંથકમાં આજે પવન સાથે ધોધમાર વરસાદ વરસ્યો હતો. આકરા ઉનાળા બાદ અને ચોમાસાના પ્રારંભે પડેલા આ વરસાદથી સમગ્ર પંથકમાં શીતળતા પ્રસરી ગઈ છે. ભારે પવન અને ગાજવીજ સાથે વરસાદ શરૂ થતાં થોડી જ વારમાં રસ્તાઓ પર પાણી ફરી વળ્યા હતા. વાહનચાલકો અને રાહદારીઓને ભારે હાલાકીનો સામનો કરવો પડ્યો હતો, પરંતુ લાંબા વિરામ બાદ મેઘરાજાની મહેરબાની થતાં લોકોમાં ખુશી જોવા મળી હતી.

ખેડૂતોમાં આનંદ

આ વરસાદથી વંથલી અને તેની આસપાસના ગ્રામ્ય વિસ્તારોના ખેડૂતોમાં આનંદની લાગણી છવાઈ ગઈ છે. ચોમાસાની શરૂઆતમાં પડેલો આ વરસાદ વાવેતર માટે ખૂબ જ અનુકૂળ માનવામાં આવે છે. ખેડૂતોને આશા છે કે આ વરસાદથી જમીનમાં ભેજનું પ્રમાણ વધશે અને આગામી દિવસોમાં પાકનું વાવેતર સરળતાથી થઈ શકશે. ઘણા ખેડૂતોએ મગફળી, કપાસ અને અન્ય પાકોના વાવેતરની તૈયારીઓ પણ શરૂ કરી દીધી છે.

નીચાણવાળા વિસ્તારોમાં પાણી ભરાયા

જોકે, ધોધમાર વરસાદને કારણે નીચાણવાળા વિસ્તારોમાં પાણી ભરાઈ ગયા હતા, જેનાથી થોડા સમય માટે જનજીવન અસ્તવ્યસ્ત થઈ ગયું હતું. તેમ છતાં, ઉનાળાની આકરી ગરમીમાંથી રાહત મળતા લોકોમાં સંતોષની લાગણી જોવા મળી હતી. હવામાન વિભાગના જણાવ્યા અનુસાર, આગામી દિવસોમાં પણ આ વિસ્તારમાં વરસાદની શક્યતા છે, જે ખેતી માટે ફાયદાકારક સાબિત થઈ શકે છે.