જૂનાગઢ જિલ્લાના મેંદરડા તાલુકામાં આવેલા આંબલા ગામ નજીક એક ફાર્મ હાઉસમાં દારૂની મહેફિલ ચાલી રહી હોવાની બાતમીના આધારે પોલીસે દરોડો પાડ્યો હતો. આ દરોડામાં કુલ 11 લોકોની ધરપકડ કરવામાં આવી છે. જેમાં 7 પુરુષો અને 4 મહિલાઓનો સમાવેશ થાય છે. આ ઘટનાએ સમગ્ર વિસ્તારમાં ચકચાર જગાવી છે. મેંદરડાના આંબલા ગામમાં આવેલા ગીર નેચરલ ફાર્મ હાઉસમાં દારૂની મહેફિલ ચાલી રહી હોવાની ચોક્કસ માહિતી જૂનાગઢ પોલીસને મળી હતી.
ગીર નેચરલ ફાર્મ હાઉસમાંથી મહેફિલ ઝડપાઇ
આ બાતમીના આધારે પોલીસે તુરંત જ દરોડો પાડ્યો હતો અને ફાર્મ હાઉસમાંથી દારૂની મહેફિલ માણતા આ 11 લોકોને રંગેહાથ ઝડપી પાડ્યા હતા. પોલીસે ઘટનાસ્થળેથી દારૂની બોટલો, ગાડીઓ અને અન્ય સામાન સહિત કુલ રૂ.10.33 લાખનો મુદ્દામાલ જપ્ત કર્યો છે. દારૂબંધીના કાયદાનો ભંગ કરવા બદલ પોલીસે આ તમામ 11 આરોપીઓ વિરુદ્ધ ગુનો નોંધીને કાયદેસરની કાર્યવાહી હાથ ધરી છે. ઝડપાયેલા લોકો કોણ છે અને આ મહેફિલ કોણે આયોજિત કરી હતી તે અંગે વધુ તપાસ ચાલી રહી છે.
