Junagadhમાં ચોમાસાની સિઝનમાં બીજીવાર વિલિંગ્ડન ડેમ થયો ઓવરફ્લો, કલેક્ટરે ડેમ પર લોકોની અવરજવર પર મૂક્યો પ્રતિબંધ

જૂનાગઢમાં આવેલા દાતારના પર્વત પર થયેલા ભારે વરસાદને કારણે શહેરને પીવાનું પાણી પૂરું પાડતો વિલિંગ્ડન ડેમ આજે ઓવરફ્લો થયો હતો. ચોમાસાની આ સિઝનમાં આ બીજી વખત છે જ્યારે આ ડેમ છલકાયો છે. જેનાથી આગામી આખા વર્ષ માટે શહેરની પાણીની સમસ્યા હલ થઈ ગઈ છે. દાતારના પહાડી વિસ્તારમાં સતત અને ભારે વરસાદ વરસતા વિલિંગ્ડન ડેમમાં પાણીની ભરપૂર આવક થઈ છે.

ભારે વરસાદના કારણે વિલીંગ્ડન ડેમ ઓવરફ્લો

ડેમ ઓવરફ્લો થતા આસપાસના વિસ્તારોમાં આનંદનો માહોલ છવાયો છે. શહેર માટે આ એક મોટા રાહતના સમાચાર છે. કારણ કે આ ડેમ જૂનાગઢના મોટા ભાગના વિસ્તારોને પીવાનું પાણી પૂરું પાડે છે. જોકે ડેમ ઓવરફ્લો થતા તંત્ર દ્વારા સાવચેતીના પગલાં પણ લેવામાં આવ્યા હતા. જિલ્લા કલેક્ટરે ડેમ પર લોકોની અવરજવર પર પ્રતિબંધ મૂક્યો છે. જેથી કોઈ અનિચ્છનીય ઘટના ન બને.

ચોમાસાની સિઝનમાં બીજી વખત ડેમ ઓવરફ્લો

સામાન્ય રીતે ડેમ ઓવરફ્લો થતા તેને જોવા માટે મોટી સંખ્યામાં લોકો ઉમટી પડતા હોય છે. પરંતુ સુરક્ષાને ધ્યાનમાં રાખીને આ પ્રતિબંધ મૂકવામાં આવ્યો હતો. આ વરસાદથી ખેડૂતો અને સ્થાનિક લોકોમાં પણ ખુશીનો માહોલ હતો. જળસ્તર વધવાથી ભૂગર્ભજળ રિચાર્જ થશે અને ખેતીને પણ ફાયદો થશે. આ ઘટના જૂનાગઢ માટે એક મોટી ખુશખબર લઈને આવી છે. જેણે આખા વર્ષ માટે પાણીની ચિંતા દૂર કરી છે.