Kutchમાં એક નબીરાએ નશાની હાલતમાં બેફામ ગાડી ચલાવી નિર્દોષોના જીવ જોખમમાં મૂક્યા, સ્થાનિકોએ ચખાડ્યો મેથીપાક

કચ્છના માંડવી-ભુજ હાઈવે પર આજે એક ગંભીર અકસ્માત સર્જાયો હતો. જેમાં નશાની હાલતમાં કાર ચલાવતા એક નબીરાએ બે કાર અને એક બાઇકને અડફેટે લીધા હતા. આ ઘટનામાં એક મહિલા, એક પુરુષ અને એક નાની બાળકી સહિત ત્રણ લોકોને ઇજાઓ પહોંચી હતી. અકસ્માત બાદ કારચાલકને લોકોએ પકડી પાડીને મેથીપાક ચખાડ્યો હતો. આ ઘટના માંડવી-ભુજ હાઈવે પર બની હતી.

માંડવી ભુજ હાઈવે પર કારચાલકે સર્જ્યો અકસ્માત

માંડવી-ભુજ હાઈવે પર નશાની હાલતમાં કાર ચલાવી રહેલા નબીરાએ પહેલા બે કારને ટક્કર મારી હતી અને ત્યારબાદ એક બાઇકને અડફેટે લીધી હતી. આ અકસ્માત એટલો ગંભીર હતો કે વાહનોને મોટું નુકસાન થયું હતું. અકસ્માત સર્જીને કારચાલક ભાગવાનો પ્રયાસ કરે તે પહેલા જ સ્થાનિક લોકોએ તેને પકડી પાડ્યો હતો. લોકોએ નશાની હાલતમાં બેફામ ગાડી ચલાવી નિર્દોષોના જીવ જોખમમાં મૂકતા નબીરાને સબક શીખવવા માટે તેને માર માર્યો હતો.

નબીરાની કારમાંથી વિદેશી દારૂની બોટલ મળી

લોકોએ તેની કારની તલાશી લેતા તેમાંથી વિદેશી દારૂની બોટલ પણ મળી આવી હતી. જેણે તેના નશામાં હોવાની વાતને સમર્થન આપ્યું હતું. ત્યારબાદ પોલીસે ઘટનાસ્થળે પહોંચીને પરિસ્થિતિને કાબુમાં લીધી હતી અને ઈજાગ્રસ્તોને તાત્કાલિક સારવાર માટે હોસ્પિટલ ખસેડ્યા હતા. આ ઘટનાએ ફરી એકવાર નશાખોરી અને બેફામ ડ્રાઈવિંગના જોખમોને ઉજાગર કર્યા હતા. પોલીસે આરોપી સામે કાયદેસરની કાર્યવાહી હાથ ધરી હતી.