Kutchના મુન્દ્રામાં ક્રેઈનની અડફેટે વૃદ્ધનું કરુણ મોત, સ્થાનિકોએ કર્યો ચક્કાજામ

કચ્છના મુન્દ્રામાં જૂના બંદર રોડ પર હાઈડ્રા ક્રેઈનની અડફેટે એક વૃદ્ધનું કરુણ મોત નીપજ્યું હતું. આ ઘટનાને કારણે સ્થાનિકોમાં ભારે ચકચાર મચી ગયો હતો. સમગ્ર ઘટનાને લઈ રહીશોમાં ભારે રોષ જોવા મળ્યો હતો. રોષે ભરાયેલા સ્થાનિકોએ રસ્તા પર ચક્કાજામ કરીને ઉગ્ર વિરોધ નોંધાવ્યો હતો. આ સમગ્ર ઘટના મુન્દ્રાના જૂના બંદર રોડ પર બની હતી. જ્યાં મૃતક વૃદ્ધ મંદિરે દર્શન કરવા આવ્યા હતા. રોડની બાજુમાં ઊભા રહીને દર્શન કરતા સમયે બેફામ ગતિએ આવતી હાઈડ્રા ક્રેઈને તેમને અડફેટે લઈ લીધા હતા.

ઘટનાના સીસીટીવી ફૂટેજ આવ્યા સામે 

ક્રેઈનની ટક્કર એટલી ભયાવહ હતી કે વૃદ્ધનું ઘટનાસ્થળે જ કમકમાટીભર્યું મોત નીપજ્યું હતું. સમગ્ર ઘટનાના સીસીટીવી ફૂટેજ સામે આવ્યા હતા. આ સીસીટીવીમાં જોવા મળ્યું હતું કે ક્રેઈનચાલકની બેદરકારીના કારણે અને ભારે વાહનોનો બેરોકટોક પ્રવેશ આ દુર્ઘટના માટે જવાબદાર છે. તદુપરાંત સ્થાનિકોએ આક્ષેપ કર્યો હતો કે આ વિસ્તારમાં ભારે વાહનોના પ્રવેશ પર પ્રતિબંધ હોવા છતાં આવા વાહનો બેરોકટોક પસાર થઈ રહ્યા છે જેના કારણે આ સ્થિતી સર્જાઈ છે.

રોષે ભરાયેલા સ્થાનિકોએ કર્યો ચક્કાજામ

આ અકસ્માત બાદ રોષે ભરાયેલા સ્થાનિક રહીશોએ તાત્કાલિક રસ્તા પર ચક્કાજામ કરી દીધો હતો. ચક્કાજામ કર્યા બાદ સ્થાનિકોએ જવાબદારો સામે કડક કાર્યવાહી કરવાની તેમજ ભારે વાહનોના પ્રવેશ પર કડક નિયંત્રણ લાદવાની માંગ કરી હતી. પોલીસે ઘટનાસ્થળે પહોંચીને પરિસ્થિતિને થાળે પાડી હતી અને આ સમગ્ર મામલે કાયદેસરની કાર્યવાહી હાથ ધરી હતી. આ ઘટનાએ ફરી એકવાર શહેરી વિસ્તારોમાં ભારે વાહનોના નિયમન અને સલામતીના મુદ્દા પર ગંભીર ચિંતન કરવાની જરૂરિયાત ઊભી કરી હતી.