Gandhinagar News : માણસામાં પોલીસના નાક નીચે દારૂનો ખુલ્લેઆમ વેપાર, સ્થાનિકો પરેશાન

ગાંધીનગર જિલ્લાના માણસા શહેરમાં, ખાસ કરીને માલણ વિસ્તારમાં જાહેરમાં દારૂનો વેપાર ધમધમી રહ્યો છે. જેના પર સ્થાનિક પોલીસ આંખ આડા કાન કરતી હોવાના ગંભીર આક્ષેપો થઇ રહ્યા છે. સ્થાનિક નાગરિકોનો સીધો આક્ષેપ છે કે, માણસા પોલીસ દારૂના વેપારીઓ પાસેથી દર મહીને હપ્તો લે છે. આ કારણે ગેરકાયદેસર પ્રવૃત્તિ બેરોકટોક ચાલી રહી છે.

SP કચેરી સહિત ઉચ્ચ કક્ષાએ અનેક વાર રજૂઆતો કરાઈ

તમને જણાવી દઈએ કે, આ બાબતે સ્થાનિક નાગરિકો દ્વારા SP કચેરી સહિત ઉચ્ચ કક્ષાએ અનેક વાર રજૂઆતો કરવામાં આવી છે, છતાં પરિસ્થિતિમાં કોઈ સુધારો જોવા મળ્યો નથી. નાગરિકોની એક જ માંગ છે કે, તેમના વિસ્તારમાં દારૂનો વેપાર તાત્કાલિક ધોરણે બંધ કરવામાં આવે અને કાયદો-વ્યવસ્થાનું પાલન કરવામાં આવે. આ બધાની વચ્ચે એક જાગૃત નાગ્તીકે પોતાની ઓળખ છુપાવીને જણાવ્યું છે કે, તેમના વિસ્તારમાં ખેલ્લામ દારૂ વેચાઈ રહ્યો છે, જેના કારણે સામાજિક વાતાવરણ બગડી રહ્યું છે અને યુવાનો બરબાદ થઇ રહ્યા છે.

જવાબદારો સામે કાર્યવાહી કરવા સ્થાનિકોની માંગ

તેમણે વધુમાં જણાવ્યું કે, પોલીસને આ બાબતે અનેક વખત રજૂઆત કરવા છતાં કોઈ કાર્યવાહી કરવામાં આવતી નથી. ઊલટું, તેઓ દર મહીને હપ્તો ઉઘરાવે છે. પોલીસની નિષ્ક્રિયતા અને હપ્તાખોરીના આક્ષેપોએ પોલીસ તંત્રની વિશ્વસનીયતા પર ગંભીર સવાલો ઊભા કર્યા છે. જો આ પ્રકારની પ્રવૃત્તિઓ પર લગામ નહીં કસવામાં આવે તો સમાજમાં ગુનાખોરી વધવાની અને કાયદાનો ડર ઘટવાની પૂરી શક્યતા છે. શું ઉચ્ચ અધિકારીઓ આ મામલે ગંભીરતા દાખવી, યોગ્ય તપાસ કરીને જવાબદારો સામે કાર્યવાહી કરશે કે પછી માલણ વિસ્તારમાં દારૂનો વેપાર પોલીસના આશીર્વાદથી ચાલુ જ રહેશે તે જોવું રહ્યું.