Ahmedabad : ગેરકાયદે ઇન્ટરનેશનલ કોલસેન્ટર ઝડપાયું, લોનની લાલચ આપી ડોલર પડાવતા હતા

અમદાવાદમાં ગેરકાયદે ચાલતું ઇન્ટરનેશનલ કોલસેન્ટર ઝડપાતા સાયબર છેતરપિંડીનો મોટો ભંડાફોડ થયો છે. શહેરના ખોખરા વિસ્તારમાં ચાલતા આ કોલસેન્ટર પર પોલીસે દરોડો પાડી બે આરોપીઓને ઝડપી પાડ્યા છે.

ગેરકાયદે ઇન્ટરનેશનલ કોલસેન્ટર ચલાવવામાં આવતું

માહિતી મુજબ ઝોન 5 LCB દ્વારા મળેલી બાતમીના આધારે કાર્યવાહી હાથ ધરવામાં આવી હતી. તપાસ દરમિયાન ખોખરા વિસ્તારમાં ગેરકાયદે ઇન્ટરનેશનલ કોલસેન્ટર ચલાવવામાં આવતું હોવાનું સામે આવ્યું હતું.

ઉમેશ ગવંડર અને પ્રવીણ અચારીની ધરપકડ

પોલીસે દરોડો પાડીને આરોપી ઉમેશ ગવંડર અને પ્રવીણ અચારીની ધરપકડ કરી છે. તપાસમાં સામે આવ્યું છે કે આરોપીઓ વિદેશી નાગરિકોને ટાર્ગેટ બનાવી છેતરપિંડી કરતા હતા.

અમેરિકાના નાગરિકોના મોબાઈલ નંબર મેળવી તેમને કોલ કરતા

આરોપીઓ ખાસ કરીને અમેરિકાના નાગરિકોના મોબાઈલ નંબર મેળવી તેમને કોલ કરતા હતા. ત્યારબાદ લોન અપાવવાની લાલચ આપી વેરિફિકેશન ફી, લોન એગ્રીમેન્ટ ફી સહિતના વિવિધ નામે ડોલરમાં રૂપિયા પડાવતા હતા.

4 મોબાઈલ ફોન, લેપટોપ

પોલીસે સ્થળ પરથી 4 મોબાઈલ ફોન, લેપટોપ અને અન્ય સામગ્રી સહિત કુલ અંદાજે રૂપિયા 2.85 લાખનો મુદ્દામાલ જપ્ત કર્યો છે.

આ પણ વાંચો---     Ahmedabad : ગુજરાત હાઇકોર્ટનો ઐતિહાસિક મોટો આદેશ, મુસ્લિમ યુવકને હિન્દુ યુવતી સાથે લગ્ન કરવા મંજૂરી