અમદાવાદ શહેરમાં રખડતા પશુઓનો ત્રાસ દૂર કરવા માટે મ્યુનિસિપલ કોર્પોરેશન દ્વારા ચલાવવામાં આવતા અભિયાનમાં અડચણ ઊભી કરવાનો કિસ્સો સામે આવ્યો છે. અમદાવાદના બોડકદેવ વિસ્તારમાં પશુ પકડવાની કામગીરી કરી રહેલી ટીમની ફરજમાં રુકાવટ નાખી પશુઓને ભગાડી દેનાર શખ્સ વિરુદ્ધ બોડકદેવ પોલીસ મથકે ગુનો નોંધવામાં આવ્યો છે.
બોડકદેવના ન્યુ સાયન્સ પાર્ક રોડ પાસેનો બનાવ
અમદાવાદ મ્યુનિસિપલ કોર્પોરેશનના CNCD વિભાગ (ઢોર ત્રાસ અંકુશ વિભાગ)ની ટીમ શહેરના ન્યુ સાયન્સ પાર્ક રોડ પાસે રખડતા ઢોર પકડવાની કામગીરી કરી રહી હતી. આ દરમિયાન જીગર ભરવાડ નામનો શખ્સ ત્યાં આવી પહોંચ્યો હતો. આરોપ છે કે તેણે કોર્પોરેશનના કર્મચારીઓ સાથે ઘર્ષણ કર્યું હતું અને પકડાયેલા પશુઓને બળજબરીપૂર્વક ભગાડી દીધા હતા. સરકારી કામગીરીમાં સીધી દખલગીરી અને અવરોધ ઊભો થતા સ્થળ પર તંગદિલી સર્જાઈ હતી.
