અમદાવાદના ઘી કાંટા વિસ્તારમાં આવેલી હયાત હોસ્પિટલમાં આજે સાંજે અચાનક આગ ફાટી નીકળતાં દોડધામ મચી ગઈ હતી. જોકે, સદભાગ્યે આગ લાગી તે સમયે હોસ્પિટલ સંપૂર્ણપણે ખાલી હોવાથી એક પણ વ્યક્તિને ઈજા થઈ નથી કે કોઈ જાનહાનિના સમાચાર નથી. સ્થાનિક લોકોમાં ભારે ગભરાટ ફેલાયો હતો, પરંતુ ફાયર બ્રિગેડની ત્વરિત કાર્યવાહીના કારણે મોટી દુર્ઘટના ટળી છે.
ફાયર વિભાગની તાત્કાલિક કામગીરી
આગની જાણ થતાં જ ફાયર અને ઇમરજન્સી સર્વિસિસ વિભાગ (FES)ની ટીમ તાત્કાલિક ઘટનાસ્થળે દોડી આવી હતી. આગ પર કાબૂ મેળવવા માટે ફાયર બ્રિગેડની બે ગાડીઓને કામે લગાડવામાં આવી હતી. ફાયર ફાઇટર્સે ભારે જહેમત બાદ આગને હોસ્પિટલના અન્ય ભાગોમાં ફેલાતી અટકાવી હતી અને થોડા જ સમયમાં આગ પર સંપૂર્ણપણે કાબૂ મેળવી લીધો હતો.
