વડાપ્રધાન નરેન્દ્ર મોદી 10-11 જાન્યુઆરી 2026ના રોજ સોમનાથની મુલાકાત લેશે અને સોમનાથ સ્વાભિમાન પર્વમાં ભાગ લેશે. 10 જાન્યુઆરીએ રાત્રે લગભગ 8 વાગ્યે તેઓ ઓમકાર મંત્રના જાપમાં ભાગ લેશે. ત્યારબાદ સોમનાથ મંદિરમાં ડ્રોન શો યોજાશે.11 જાન્યુઆરીએ સવારે લગભગ 9:45 વાગ્યે પ્રધાનમંત્રી શૌર્ય યાત્રામાં ભાગ લેશે.શૌર્ય યાત્રામાં 108 અશ્વોની પ્રતીકાત્મક શોભાયાત્રાનો સમાવેશ થશે, જે બહાદુરી અને બલિદાનનું પ્રતીક છે. ત્યારબાદ સવારે આશરે 10:15 વાગ્યે પ્રધાનમંત્રી સોમનાથ મંદિરમાં દર્શન અને પ્રાર્થના કરશે. લગભગ 11 વાગ્યે, પ્રધાનમંત્રી સોમનાથ ખાતે એક જાહેર કાર્યક્રમમાં ભાગ લેશે અને જનતાને સંબોધિત કરશે.
વડાપ્રધાન મોદીનું ટ્વિટ
વડાપ્રધાન મોદીએ ટ્વિટર પર ટ્વિટ કરીને કહ્યું હતું કે, સોમનાથ સ્વાભિમાન પર્વ આપણી આધ્ચાત્મિક પરંપરાનું એક સશક્ત પ્રતિક છે. જેને દેશભરમાં પૂરી શ્રદ્ધા, ભક્તિ અને ઉલ્લાસ સાથે ઉજવવામાં આવી રહ્યું છે. આવતીકાલે રાત્રે લગભગ આઠ વાગ્યે સોમનાથ મંદિરમાં ઓમકાર મંત્રના દિવ્ય જાપમાં ઉપસ્થિત રહેવાનું સૌભાગ્ય મળશે. ત્યાર બાદ બીજા દિવસે સવારે 9.45 વાગ્યે માં ભારતીના અનેક વીર સંતાનોને સમર્પિત શૌર્ય યાત્રામાં સામેલ થયા બાદ મંદિરમાં મહાદેવના દર્શન અને પૂજા કરીશ. ત્યાર બાદ એક સાર્વજનિક કાર્યક્રમમાં પણ હિસ્સો લેવાનો અવસર મળશે.
સોમનાથમાં સોમનાથ સ્વાભિમાન પર્વની ઉજવણી
8 થી 11 જાન્યુઆરી, 2026 દરમિયાન સોમનાથમાં સોમનાથ સ્વાભિમાન પર્વની ઉજવણી કરવામાં આવી રહી છે. આ પર્વ તે અસંખ્ય નાગરિકોને યાદ કરવા માટે આયોજિત કરવામાં આવી રહ્યું છે જેમને મંદિરના રક્ષણ માટે આપેલું બલિદાન આવનારી પેઢીઓની સાંસ્કૃતિક ચેતનાને પ્રેરણા આપતું રહેશે.આ ઘટના 1026માં સોમનાથ મંદિર પર મહમૂદ ગઝનવીના હુમલાની 1000મી વર્ષગાંઠ છે. સદીઓથી તેને નષ્ટ કરવાના વારંવાર પ્રયાસો છતાં, સોમનાથ મંદિર હજુ પણ સ્થિતિસ્થાપકતા, શ્રદ્ધા અને રાષ્ટ્રીય ગૌરવના શક્તિશાળી પ્રતીક તરીકે ઉભું છે, જે સામૂહિક સંકલ્પ અને તેને તેના પ્રાચીન ગૌરવમાં પુનઃસ્થાપિત કરવાના પ્રયાસોને આભારી છે.સ્વતંત્રતા પછી મંદિરના પુનર્નિર્માણ પ્રયાસની શરૂઆત સરદાર પટેલ દ્વારા કરવામાં આવી હતી.
ભારતના સમૃદ્ધ સાંસ્કૃતિક અને આધ્યાત્મિક વારસાને જાળવવા
પુનઃસ્થાપનની આ યાત્રામાં સૌથી મહત્વપૂર્ણ સીમાચિહ્નો પૈકી એક 1951માં પ્રાપ્ત થયું હતું, જ્યારે ભારતના તત્કાલીન રાષ્ટ્રપતિ ડૉ. રાજેન્દ્ર પ્રસાદની હાજરીમાં નવીનીકૃત સોમનાથ મંદિરને વિધિવત રીતે ભક્તો માટે ખુલ્લું મૂકવામાં આવ્યું હતું. 2026માં આ ઐતિહાસિક પુનર્નિર્માણના 75 વર્ષ પૂર્ણ થવાથી સોમનાથ સ્વાભિમાન પર્વને વિશેષ મહત્વ મળે છે.આ ઉત્સવમાં દેશભરમાંથી સેંકડો સંતો મંદિર સંકુલમાં 72 કલાક સુધી 'ઓમ'ના સતત જાપ સાથે ઉજવણીમાં ભાગ લેશે.સોમનાથ સ્વાભિમાન પર્વમાં પ્રધાનમંત્રીની ભાગીદારી ભારતની સભ્યતાની સ્થાયી ભાવનાને રેખાંકિત કરે છે અને ભારતના સમૃદ્ધ સાંસ્કૃતિક અને આધ્યાત્મિક વારસાને જાળવવા અને ઉજવવા માટેની તેમની પ્રતિબદ્ધતાને પુનઃપુષ્ટ કરે છે.
આ પણ વાંચોઃ Budget Session 2026 News: બજેટ 1 ફેબ્રુઆરીએ થશે રજૂ, 28 જાન્યુઆરીથી સત્રની શરૂઆત
