અમદાવાદના વાડજ વિસ્તારમાં એક યુવક નશાની હાલતમાં છરી લઈને જાહેર રોડ પર આતંક મચાવતો હોય તેવો વીડિયો વાયરલ થયો છે. આ શખ્સ હાથમાં ખુલ્લી છરી રાખીને રસ્તા પરથી પસાર થતા લોકોને ડરાવી રહ્યો હતો અને અત્યંત બીભત્સ ગાળો બોલી રહ્યો હતો. આ ઘટનાને પગલે સ્થાનિક રહીશો અને રાહદારીઓમાં ભારે ફફડાટ વ્યાપી ગયો હતો. વીડિયોમાં દેખાતો શખ્સ નશામાં એટલો ચકચૂર હતો કે તેણે પોલીસ પ્રશાસન વિશે પણ અપશબ્દો બોલતા અચકાયો નહોતો.
જાહેર રોડ પર છરી વડે લોકોને ડરાવ્યા
વાયરલ થયેલા વીડિયોમાં સ્પષ્ટ જોઈ શકાય છે કે આ શખ્સ હાથમાં ઘાતક હથિયાર સાથે રસ્તાની વચ્ચે ઊભો છે અને જાહેરમાં લોકોને ધમકાવી રહ્યો છે. રસ્તા પર આ પ્રકારે નશાખોર શખ્સે આતંક મચાવતા વાહનચાલકોએ પણ પોતાના વાહનો થંભાવી દીધા હતા. આ સમગ્ર ઘટના કોઈએ મોબાઈલ કેમેરામાં કેદ કરી લીધી હતી, જે હવે સોશિયલ મીડિયા પર જોરશોરથી વાયરલ થઈ રહી છે. પોલીસ વિશેના બીભત્સ ઉચ્ચારણોને કારણે પોલીસ તંત્રની આબરૂ પર પણ સવાલો ઉઠી રહ્યા છે.
