Ahmedabad News: હવે ટ્રાફિક પોલીસ પર રહેશે 'પ્રમાણ' એપની નજર

અમદાવાદ શહેરના ટ્રાફિક પોલીસ કર્મીઓની ફરજ અને તેમની હાજરીને લઈને અત્યાર સુધી જે અનિશ્ચિતતાઓ રહેતી હતી, તેનો હવે અંત આવશે. અમદાવાદ પોલીસ વિભાગ દ્વારા ખાસ ટ્રાફિક પોલીસ જવાનો માટે 'પ્રમાણ' નામની એપ્લિકેશન લોન્ચ કરવામાં આવી છે. આ નવી વ્યવસ્થા 1 જાન્યુઆરી થી સમગ્ર શહેરમાં અમલી બનશે.

શું છે 'પ્રમાણ' એપની ખાસિયતો?

આ એપ મુખ્યત્વે પોલીસકર્મીઓના રોલકોલ અને મેનેજમેન્ટ સિસ્ટમ માટે તૈયાર કરવામાં આવી છે. તેનાથી વહીવટી પ્રક્રિયા વધુ ઝડપી અને સચોટ બનશે:

• લોકેશન બેઝ્ડ હાજરી: પોલીસકર્મી જ્યારે પોતાની ફરજ પર પહોંચીને હાજરી પૂરશે, ત્યારે સિસ્ટમ આપોઆપ તેમનું લોકેશન ટ્રેક કરશે. આનાથી એ સ્પષ્ટ થશે કે કર્મચારી ખરેખર સોંપેલ પોઈન્ટ પર હાજર છે કે નહીં.
• રિયલ-ટાઇમ મોનિટરિંગ: ફરજ દરમિયાન પોલીસકર્મી કયા લોકેશન પર છે, તેની વિગતો ઉચ્ચ અધિકારીઓ ઓનલાઇન જોઈ શકશે.
• ડિજિટલ રજા રિપોર્ટ: હવે રજા લેવા માટે લાંબી કાગળિયા પ્રક્રિયાને બદલે પોલીસકર્મીઓ એપ દ્વારા જ રિકવેસ્ટ મોકલી શકશે અને તેની મંજૂરી પણ ઓનલાઇન મેળવી શકશે.
• સંપૂર્ણ પ્રોફાઇલ: કર્મચારીની હાજરી, રજા અને ફરજની તમામ માહિતી એક જ પ્લેટફોર્મ પર ઉપલબ્ધ રહેશે.

પારદર્શિતામાં થશે વધારો

અત્યાર સુધી ફિલ્ડ પર રહેલા ટ્રાફિક પોલીસ જવાનોની સચોટ માહિતી મેળવવી પડકારજનક હતી, પરંતુ આ એપના માધ્યમથી કામચોરી અટકશે અને પ્રામાણિકતાથી ફરજ બજાવતા કર્મચારીઓનો ડેટા પણ સચોટ જળવાશે. નવા વર્ષની શરૂઆત સાથે જ અમદાવાદ ટ્રાફિક પોલીસ 'હાઇટેક' બનીને રસ્તાઓ પર ઉતરશે.

આ પણ વાંચો - Ahmedabad: પોલીસનું માનવીય અભિગમ, ખોખરામાં DCP જીતેન્દ્ર અગ્રવાલ દ્વારા ‘દાન પુન કેન્દ્ર’નો પ્રારંભ