શક્તિપીઠ અંબાજી ખાતે માઈભક્તોની અતૂટ શ્રદ્ધા અવારનવાર દાન સ્વરૂપે જોવા મળતી હોય છે. તાજેતરમાં સુરતથી આવેલા એક પરમ ભક્તે અંબાજી માતાના ચરણોમાં સોના અને ચાંદીની લગડીઓ અર્પણ કરી અનોખી ભક્તિ પ્રગટ કરી છે. સુરતના આ દાતાએ કુલ 16.24 લાખ રૂપિયાની કિંમતનું દાન મંદિર ટ્રસ્ટને સુપરત કર્યું છે.
માતાજીના ચરણોમાં સોનું-ચાંદી અર્પણ
સુરતના ભક્તે માતાજીના સુવર્ણ શિખર અને અન્ય ધાર્મિક કાર્યોના હેતુસર આ દાન આપ્યું છે. દાતા દ્વારા અર્પણ કરવામાં આવેલી વસ્તુઓની વિગત નીચે મુજબ છે: 100 ગ્રામ સોનાની એક કિંમતી લગડી અર્પણ કરી છે, જેની બજાર કિંમત અંદાજે 16 લાખ રૂપિયા આંકવામાં આવી છે. 100 ગ્રામ ચાંદી અર્પણ કરી છે, જેમાં 50-50 ગ્રામની બે લગડીઓનો સમાવેશ થાય છે. આ ચાંદીની કિંમત આશરે 24,000 રૂપિયા છે.
