દક્ષિણ ગુજરાતમાં વહેલી સવારના ગાઢ ધુમ્મસના કારણે વાહનવ્યવહાર પર માઠી અસર પડી રહી છે, જે હવે જીવલેણ સાબિત થઈ રહી છે. ભરૂચ જિલ્લાના અંકલેશ્વર પાસે આવેલા પાનોલી નજીક આજે વહેલી સવારે ધુમ્મસભર્યા વાતાવરણને કારણે દ્રશ્યતામાં ઘટાડો થયો હતો. જે કારણે કાર અને બાઈક વચ્ચે ગમખ્વાર અકસ્માત સર્જાયો હતો. આ દુર્ઘટનામાં બાઈક સવાર બે આશાસ્પદ યુવાનોના મોત નીપજ્યા છે.
દ્રશ્યતા ઓછી હોવાથી સર્જાયો અકસ્માત
ઘટનાની મળતી માહિતી અનુસાર, પાનોલી હાઈવે પર આજે સવારે ભારે ધુમ્મસ હોવાને કારણે વિઝિબિલિટી ખૂબ જ ઓછી હતી. આ દરમિયાન એક બાઈક અને કાર વચ્ચે જોરદાર ટક્કર થઈ હતી. ટક્કર એટલી પ્રચંડ હતી કે બાઈક સવાર બંને યુવાનો માર્ગ પર ફંગોળાયા હતા અને તેમને ગંભીર ઈજાઓ પહોંચી હતી. સ્થાનિક લોકો મદદ માટે દોડી આવ્યા હતા, પરંતુ ઈજાઓ જીવલેણ હોવાથી બંનેએ ઘટના સ્થળે જ દમ તોડ્યો હતો.
