છોટાઉદેપુર જિલ્લાના આદિવાસી સંસ્કૃતિના પર્વોમાં જેની આતુરતાથી રાહ જોવાય છે તેવો પરંપરાગત 'ચુલનો મેળો' આજે નગરના પટાંગણમાં ભવ્ય રીતે યોજાયો હતો. વર્ષો જૂની પરંપરા મુજબ, હોળીના બીજા દિવસે એટલે કે ધુળેટીના પર્વે આ મેળાનું આયોજન કરવામાં આવે છે, જેમાં આદિવાસી સમાજની અતૂટ શ્રદ્ધા અને સાહસના દર્શન થાય છે.
અંગારા પર ચાલવાની અનોખી આસ્થા
આ મેળાનું મુખ્ય આકર્ષણ ધગધગતા અંગારા પર ચાલવાનો રિવાજ છે. જે શ્રદ્ધાળુઓએ વર્ષ દરમિયાન કોઈ માનતા માની હોય, તે પૂરી થતાં તેઓ ઉઘાડા પગે ધગધગતા અંગારાની 'ચુલ' (ખાડો) પરથી પસાર થાય છે. આદિવાસી યુવાનોને કોઈ પણ જાતની ઈજા વગર અંગારા પર ચાલતા જોઈને હાજર લોકો દંગ રહી ગયા હતા. આ પરંપરા પાછળ એવી માન્યતા છે કે, અગ્નિદેવ તેમના કષ્ટ દૂર કરે છે અને સુખાકારી અર્પે છે.
