રાજ્યમાં મહિલાઓ અને સગીરાઓ સુરક્ષિત છે, તેવા દાવાઓ વચ્ચે છોટાઉદેપુર જિલ્લાના નવનિર્મિત કદવાલ તાલુકામાંથી એક હૃદયદ્રાવક ઘટના સામે આવી છે. અહીં એક 13 વર્ષીય માસૂમ સગીરાની અજાણ્યા શખ્સો દ્વારા નિર્મમ હત્યા કરવામાં આવતા સમગ્ર પંથકમાં ચકચાર મચી ગઈ છે. સગીરાનો મૃતદેહ તેના ઘરની બાજુમાં આવેલા ખેતરમાંથી મળી આવતા અરેરાટી વ્યાપી ગઈ છે.
ઘટનાની વિગત
ઘટનાની મળતી માહિતી અનુસાર, છોટા ઉદેપુર જિલ્લાના કદવાલ તાલુકાના એક ગામમાં રહેતી 13 વર્ષીય સગીરા ગત રાત્રિથી ગુમ હતી અથવા ઘરેથી બહાર ગઈ હતી. પરિવારજનો તેની શોધખોળ કરી રહ્યા હતા, તે દરમિયાન વહેલી સવારે ઘરની એકદમ નજીક આવેલા ખેતરમાંથી સગીરાની લોહીલુહાણ હાલતમાં મૃતદેહ મળી આવ્યો હતો. સગીરાના શરીર પર ઈજાના નિશાન હોવાથી પ્રાથમિક દ્રષ્ટિએ જ આ હત્યાનો મામલો હોવાનું જણાતું હતું.
પોલીસ કાર્યવાહી અને તપાસ
કદવાલ પોલીસ તાત્કાલિક ઘટનાસ્થળે પહોંચી હતી અને પંચનામું કરી સગીરાના મૃત દેહને પોસ્ટમોર્ટમ અર્થે સરકારી હોસ્પિટલમાં ખસેડ્યો હતો. પોલીસે અજાણ્યા શખ્સ વિરૂદ્ધ હત્યાનો ગુનો નોંધીને તપાસનો ધમધમાટ તેજ કર્યો છે. આ હત્યા પાછળનું કારણ શું છે? શું કોઈ અંગત અદાવતમાં આ હત્યા કરવામાં આવી છે કે પછી કોઈ અન્ય ગંભીર ગુનો આચરીને પુરાવા મિટાવવા માટે સગીરાને મોતને ઘાટ ઉતારવામાં આવી છે? આ તમામ સવાલો હાલ પોલીસ માટે તપાસનો વિષય બન્યા છે.
પોલીસ દ્વારા ગામના લોકોની પૂછપરછ શરૂ કરવામાં આવી છે અને શંકાસ્પદ લોકો પર નજર રાખવામાં આવી રહી છે. પોસ્ટ મોર્ટમ રિપોર્ટ આવ્યા બાદ સગીરા સાથે કોઈ દુષ્કર્મ થયું છે કે, કેમ તે અંગે પણ ખુલાસો થશે. હાલ તો માસૂમ બાળકીની હત્યાથી પરિવારમાં માતમ છવાયો છે અને ગ્રામજનોમાં ભારે રોષ જોવા મળી રહ્યો છે.
આ પણ વાંચો - Chhota Udepur News: માર્ગ અકસ્માતમાં GRD જવાનનું મોત
