રાજકોટ જિલ્લાના ધોરાજી તાલુકામાં આજે એક મોટી દુર્ઘટના ટળી હતી. તોરણીયા અને મોટી પરબડી ગામ વચ્ચેના માર્ગ પર પશુઓનો ઘાસચારો ભરીને જઈ રહેલું એક ટ્રેક્ટર અચાનક નદીમાં ખાબકતા અરેરાટી વ્યાપી ગઈ હતી. જોકે, "રામ રાખે તેને કોણ ચાખે" એ ઉક્તિ મુજબ આ ગંભીર અકસ્માતમાં ડ્રાઇવરનો આબાદ બચાવ થયો છે.
ઘટનાની વિગત
ઘટનાની મળતી માહિતી અનુસાર, રાજકોટ જિલ્લાના ધોરાજી તાલુકાના તોરણીયાથી મોટી પરબડી તરફ જતા માર્ગ પર પાલો ભરેલું એક ટ્રેક્ટર પસાર થઈ રહ્યું હતું. આ દરમિયાન કોઈ અકળ કારણોસર ડ્રાઇવરે ટ્રેક્ટર પરનો કાબુ ગુમાવ્યો હતો. સ્ટેયરિંગ પરથી કાબુ ગુમ થતા ટ્રેક્ટર સીધું માર્ગ પાસે આવેલી નદીના પટમાં ખાબક્યું હતું. ટ્રેક્ટર નદીમાં પડતા જ આસપાસના લોકો દોડી આવ્યા હતા.
