Gandhinagar : વિધાનસભા સત્રમાં ચૂંટણીની ચર્ચાનો મુદ્દો બાકાત, મુદ્દો નક્કી હોવા છતાં ચર્ચા ન થવા પાછળ અનેક તર્ક

ગાંધીનગર ખાતે ચાલી રહેલા ગુજરાત વિધાનસભા સત્રમાં ચૂંટણી ખર્ચ અંગે થવાની ચર્ચા હવે ટળી ગઈ છે. 9 માર્ચના રોજ યોજાયેલી બેઠક દરમિયાન આ મુદ્દા પર ચર્ચા થવાની હતી, પરંતુ શોકદર્શક ઉલ્લેખ બાદ ગૃહની કાર્યવાહી મુલતવી રાખવામાં આવતા ચર્ચા થઈ શકી નહોતી. હવે આવતીકાલે યોજાનારી ચર્ચાની યાદીમાંથી પણ ચૂંટણી સંબંધિત મુદ્દો બાકાત રાખવામાં આવ્યો છે.

ચૂંટણી માટે રૂ. 240 કરોડની માંગણી કરવામાં આવી

વિધાનસભામાં સામાન્ય વહીવટ વિભાગના શિર્ષક હેઠળ ચૂંટણી માટે રૂ. 240 કરોડની માંગણી કરવામાં આવી છે. આ મુદ્દો માંગણીઓ અને ચર્ચા પર મતદાન અંતર્ગત આવતો હતો. સામાન્ય રીતે વિધાનસભા સત્ર પહેલાં સર્વ પક્ષોની બેઠકમાં કયા મુદ્દાઓ પર ચર્ચા થશે તે નક્કી કરવામાં આવે છે. આ વખતે પણ ચૂંટણી મુદ્દો ચર્ચા માટે નક્કી કરવામાં આવ્યો હતો.

 રાજકીય વર્તુળોમાં ચર્ચા તેજ બની

તેમ છતાં હવે આ મુદ્દા પર ચર્ચા ન થવાથી રાજકીય વર્તુળોમાં ચર્ચા તેજ બની છે. સત્તાપક્ષનું કહેવું છે કે વિધાનસભાની પ્રણાલીને આધિન ચર્ચા કરાઇ નથી. સત્તાપક્ષના નેતાઓના જણાવ્યા મુજબ અગાઉ પણ આ મુદ્દા પર ચર્ચા થઈ ચૂકી હોવાથી ફરી ચર્ચા કરવી યોગ્ય નથી.

ચર્ચા નહિ કરીને સરકારનો છટકવાનો પ્રયાસ

બીજી તરફ વિરોધ પક્ષ દ્વારા સરકાર પર આક્ષેપ કરવામાં આવ્યા છે. વિરોધ પક્ષનું કહેવું છે કે ચર્ચા ટાળીને સરકાર ચૂંટણી ખર્ચના મુદ્દે જવાબદારીમાંથી છટકવાનો પ્રયાસ કરી રહી છે.

આ પણ વાંચો---     Gandhinagar : સ્થાનિક સ્વરાજ્યની ચૂંટણીમાં રાજકીય પક્ષો માટે ઉમેદવારીનું ગણિત સંપૂર્ણ બદલાઈ શકે