ગાંધીનગર જિલ્લાના કલોલ હાઈવે પર આજે એક બેફામ બનેલા થાર ચાલકે મોતનું તાંડવ સર્જ્યું હતું. કલોલ હાઈવેના સર્વિસ રોડ પર પૂરઝડપે આવી રહેલી થાર કારના ચાલકે સ્ટેયરિંગ પરનો કાબૂ ગુમાવતા એક પછી એક ચાર વાહનોને અડફેટે લીધા હતા. આ અકસ્માતમાં બે વર્ષના માસૂમ બાળક સહિત કુલ ચાર વ્યક્તિઓને ગંભીર ઈજાઓ પહોંચતા સમગ્ર વિસ્તારમાં અફરાતફરી મચી ગઈ હતી.
બાઈક, મોપેડ અને ટેમ્પોના કચડ્યા
પ્રત્યક્ષદર્શીઓના જણાવ્યા મુજબ, થાર કારનો ચાલક કોઈને પણ અડફેટે લેશે તેવા અંદાજ સાથે પૂરઝડપે કાર હંકારી રહ્યો હતો. તેણે સર્વિસ રોડ પર જઈ રહેલા એક બાઈક, એક મોપેડ અને ઉભેલા ટેમ્પો સહિત કુલ 4 વાહનોને જોરદાર ટક્કર મારી હતી. ટક્કર એટલી પ્રચંડ હતી કે વાહનોનો કચ્ચરઘાણ નીકળી ગયો હતો અને માર્ગ પર લોહીના ખાબોચિયા ભરાઈ ગયા હતા.
