ગીર સોમનાથ જિલ્લામાં અસામાજિક તત્ત્વોનો આતંક સતત વધી રહ્યો છે. આવા લુખ્ખા તત્ત્વો સમાજનું વાતાવરણ બગાડી ગુનાખોરીની ઘટનાઓને બેફામ રીતે અંજામ આપી રહ્યા હોય તેમ જણાઈ રહ્યું છે. આવામાં જિલ્લામાં વધુ એક મારામારીનો કિસ્સો સામે આવતા સમગ્ર પંથકમાં ચકચાર મચી જવા પામી છે.
યુવકને ગંભીર ઈજાઓ પહોંચી
ઘટનાની મળતી માહિતી અનુસાર, ગીર સોમનાથ જિલ્લાના ઉના તાલુકામાં આવેલા દેલવાડા ગામમાં મારામારી થઈ હતી. જમીન વિવાદમાં એક જ પરિવાર વચ્ચે મારામારી થતા ગામમાં અફરાતફરીનો માહોલ જોવા મળ્યો હતો. આ મારામારી દરમિયાન એક યુવક પર હથિયારથી જીવલેણ હુમલો કરવામાં આવ્યો હતો. આ હુમલામાં યુવકને ગંભીર ઈજાઓ પહોંચી છે. જે કારણે તેને બાઈક પર તાત્કાલિક સારવાર માટે હોસ્પિટલ લઈ જવામાં આવ્યો હતો. આ મારામારીની ઘટના સીસીટીવીમાં કેદ થઈ છે.
