રાજકોટ જિલ્લાના ગોંડલ પંથકમાંથી એક અત્યંત કરુણ અને હૃદયદ્રાવક ઘટના સામે આવી છે. વેરાવળ-રાજકોટ લોકલ ટ્રેન નીચે એક આશરે ૨૫ વર્ષીય અજાણ્યા યુવકે અચાનક ઝંપલાવીને આપઘાત કરી લીધો છે. ગોમટા નજીક રેલવે ટ્રેક પર બનેલી આ ઘટનાને પગલે રેલવે પોલીસનો કાફલો તાત્કાલિક ઘટનાસ્થળે દોડી ગયો હતો અને કાયદેસરની કાર્યવાહી હાથ ધરી છે.
ટ્રેન ઉપડતા જ યુવકે લગાવી મોતની છલાંગ
આ આઘાતજનક ઘટના ગોમટા રેલવે સ્ટેશનથી રાજકોટ તરફ જતી રેલવે લાઇન પર સાંઢીયા પુલ અને ગુંદાળા ફાટક વચ્ચે બની હતી. ટ્રેન નંબર 59422 (વેરાવળ-રાજકોટ લોકલ) ગોમટા સ્ટેશનથી ઉપડીને આગળ વધી રહી હતી, ત્યારે ગણતરીની મિનિટોમાં જ પિલર નંબર 43/2/3 પાસે એક યુવકે ચાલુ ટ્રેન નીચે પડતું મૂક્યું હતું. ટ્રેનની અડફેટે આવતા જ ગંભીર ઇજાઓ થવાના કારણે આશરે 25 વર્ષના યુવાનનું ઘટનાસ્થળે જ કમકમાટીભર્યું મોત નીપજ્યું હતું.
