સાબરકાંઠા જિલ્લામાં જુદા જુદા ખાનગી ઇનપુટો ધ્યાને લેતાં જિલ્લામાં અસામાજીક તત્વો ધ્વારા અઘટિત બનાવ ન-બને તે માટે તેમજ જિલ્લામાં કાયદો અને વ્યવસ્થા જળવાઈ રહે તે સારુ અધિક જિલ્લા મેજીસ્ટ્રેટ દ્વારા જાહેરનામું બહાર પાડવામાં આવ્યું છે. જેમાં હથિયાર બંધી સહિત ચાર કે તેથી વધુ વ્યક્તિઓના ભેગા થવા પર પ્રતિબંધ લગાવી દેવામાં આવ્યો છે.
હથિયારો અને ચારથી વધુ લોકોના ભેગા થવા પર પ્રતિબંધ
અધિક જિલ્લા મેજીસ્ટ્રેટ દ્વારા સાબરકાંઠામાં આગામી ચોથી ડિસેમ્બર સુધી નગરપાલિકા વિસ્તાર અને જિલ્લામાં મંજૂરી વિના ચાર કે તેથી વધુ વ્યક્તિઓના ભેગા થવા પર તેમજ સભા સરઘસ અને ધરણાં, ઉપવાસ, દેખાવોની પ્રવૃત્તિ કરવા પર પ્રતિબંધ ફરમાવાયો છે. આ ઉપરાંત મંજુરી મેળવ્યા સિવાય શસ્ત્રો , દંડ, તલવાર, ભાલા, ધોકા, બંદુક, ચપ્પુ, લાકડી, લાઠી, કુલ્લીવાળી લાકડી તથા શારિરીક ઈજા પહોંચાડી શકે તેવા કોઈપણ પ્રકારના સાધનો ધારણ કરવાની કે સાથે લઈ જવાની મનાઇ ફરમાવાઈ છે. આ પ્રતિબંધક હુકમનો ભંગ કરનાર વ્યક્તિ દંડ અને શિક્ષાને પાત્ર થશે.
