જૂનાગઢના પ્રસિદ્ધ ભવનાથ ક્ષેત્રમાં શિવરાત્રીના મેળા દરમિયાન મહિલા પોલીસ અધિકારી સાથે ગેરવર્તન કરવાનો મામલો ગરમાયો છે. આ ઘટનામાં આરોપી સોશિયલ મીડિયા ઈન્ફ્લુએન્ઝર કીર્તિ પટેલ આજે પોતાના વકીલ સાથે જૂનાગઢ તાલુકા પોલીસ સ્ટેશનમાં હાજર થઈ છે. મહિલા પોલીસ ઈન્સ્પેક્ટર (PI) ની ફરજમાં રુકાવટ અને ગેરવર્તન કરવા બદલ તેની સામે કાયદેસરની ફરિયાદ નોંધાઈ હતી.
તાલુકા પોલીસ સ્ટેશનમાં હાજર થઈ કિર્તી પટેલ
મહાશિવરાત્રીના પવિત્ર પર્વ નિમિત્તે જૂનાગઢના ભવનાથ તળેટીમાં આવેલા મૃગી કુંડમાં સ્નાન કર્યા બાદ કીર્તિ પટેલ અને ત્યાં ફરજ પર તૈનાત મહિલા પી.આઈ. વચ્ચે કોઈ બાબતે બોલાચાલી થઈ હતી. આરોપ છે કે કીર્તિ પટેલે પોલીસ અધિકારી સાથે ઉદ્ધત વર્તન કર્યું હતું અને તેમની સરકારી ફરજમાં અડચણ ઊભી કરી હતી. આ ઘટનાનો વીડિયો પણ સોશિયલ મીડિયા પર વાયરલ થયો હતો, ત્યારબાદ પોલીસે ગુનો નોંધી તપાસ હાથ ધરી હતી.
