જૂનાગઢમાં આગામી મહાશિવરાત્રીના મેળાના આયોજનને ધ્યાનમાં રાખીને વહીવટી તંત્ર દ્વારા ભવનાથ વિસ્તારમાં દબાણ હટાવવાની સઘન કામગીરી હાથ ધરવામાં આવી છે. આ કામગીરી દરમિયાન દુકાનદારો અને હોટલો દ્વારા કરવામાં આવેલા 20થી વધુ દબાણોને દૂર કરવામાં આવ્યા છે. પ્રવાસીઓને મેળા દરમિયાન મુશ્કેલી ન પડે તે માટે રસ્તાઓ ખુલ્લા કરવા અને પાર્કિંગની જગ્યાઓ ખાલી કરાવવાના ઉદ્દેશ્યથી આ કાર્યવાહી કરવામાં આવી છે.
મહાશિવરાત્રીના મેળા પહેલા દબાણો હટાવાયા
દબાણ હટાવવાની આ કામગીરી વહીવટી તંત્ર, મહાનગરપાલિકા અને પોલીસની સંયુક્ત કામગીરી હતી. પ્રાંત અધિકારી, મામલતદાર અને પોલીસ અધિકારીઓની હાજરીમાં આ કાર્યવાહી હાથ ધરાઈ હતી. દબાણો હટાવવા માટે 2 જેસીબી (JCB) અને 4 ટ્રેક્ટરનો ઉપયોગ કરવામાં આવ્યો હતો. તંત્રના આ પગલાથી મેળામાં આવતા લાખો શ્રદ્ધાળુઓ અને પ્રવાસીઓ માટે અવરજવર સરળ બનશે.
