ગુજરાતમાં શિયાળાની જમાવટ વચ્ચે આજે નર્મદા જિલ્લાના કેવડિયા અને એકતાનગર વિસ્તારમાં અદભૂત પણ જોખમી માહોલ જોવા મળ્યો હતો. વિશ્વની સૌથી ઊંચી પ્રતિમા 'સ્ટેચ્યુ ઓફ યુનિટી'ની આસપાસના વિસ્તારોમાં આજે વહેલી સવારથી જ ગાઢ ધુમ્મસની ચાદર છવાઈ ગઈ હતી, જેના કારણે સમગ્ર વિસ્તારમાં કાશ્મીર જેવો અહેસાસ થતો હતો.
વાહનચાલકોની મુશ્કેલીમાં વધારો
ધુમ્મસ એટલું ગાઢ હતું કે, દિવસે પણ રોડ પર 50 મીટરથી દૂરનું અંતર જોવું અશક્ય બની ગયું હતું. આ સ્થિતિને કારણે વાહનચાલકો ભારે મુશ્કેલીમાં મુકાયા હતા. હાઈવે અને આંતરિક રસ્તાઓ પર ડ્રાઈવરોએ પોતાની સુરક્ષા માટે હેડલાઈટ અને પાર્કિંગ લાઈટ ચાલુ રાખીને વાહનો ચલાવવાની ફરજ પડી હતી. ઓછી વિઝિબિલિટીને કારણે વાહન વ્યવહારની ગતિ ધીમી પડી ગઈ હતી.
વિદ્યાર્થીઓ અને મુસાફરો અટવાયા
વહેલી સવારે શાળા અને કોલેજ જતા વિદ્યાર્થીઓને આ ધુમ્મસને કારણે ભારે હાલાકીનો સામનો કરવો પડ્યો હતો. ઠંડી અને ધુમ્મસના મિશ્રણને કારણે સામાન્ય જનજીવન પર વ્યાપક અસર જોવા મળી હતી. માત્ર સ્થાનિકો જ નહીં, પરંતુ સ્ટેચ્યુ ઓફ યુનિટીની મુલાકાતે આવેલા પ્રવાસીઓ માટે પણ આ નજારો આશ્ચર્યજનક રહ્યો હતો, જોકે મુસાફરીમાં વિલંબ થતા અનેક લોકો અટવાયા હતા.
કુદરતી સૌંદર્યમાં વધારો
એક તરફ ધુમ્મસ મુશ્કેલી લાવ્યું હતું, તો બીજી તરફ નર્મદાની પહાડીઓ અને એકતાનગરનો નજારો જોવાલાયક બન્યો હતો. પહાડો વચ્ચેથી પસાર થતી ધુમ્મસની લહેરોને કારણે પ્રવાસીઓએ આ સોહામણા વાતાવરણનો આનંદ પણ માણ્યો હતો. હવામાન વિભાગના મતે, આગામી દિવસોમાં ઠંડીનું જોર વધવાની સાથે આવા ધુમ્મસભર્યા દિવસો હજુ પણ જોવા મળી શકે છે.
આ પણ વાંચો - Narmada:કેવડિયાનું જંગલ સફારી આકર્ષણનું કેન્દ્ર
