નવસારી સ્પેશિયલ ઓપરેશન ગ્રુપ (SOG) ની ટીમે નશીલા પદાર્થોના વેચાણ વિરુદ્ધ ચાલી રહેલી ઝુંબેશમાં મોટી સફળતા મેળવી છે. પોલીસને બાતમી મળી હતી કે અગાઉના એનડીપીએસ (NDPS) ના ગુનામાં વોન્ટેડ જાહેર થયેલો આરોપી વાસુદેવ પાટીલ શહેરના ગ્લો ગાર્ડન નજીક છુપાયેલો છે. આ બાતમીના આધારે એસઓજીની ટીમે ઓચિંતો દરોડો પાડી આરોપીને દબોચી લીધો હતો. આરોપીની પૂછપરછ બાદ પોલીસે તેના ઘરે તપાસ હાથ ધરતા ત્યાંથી 5 કિલોથી વધુનો ગાંજાનો જથ્થો મળી આવ્યો હતો.
શહેરના ગ્લો ગાર્ડન નજીકથી આરોપી ઝડપાયા
આ કાર્યવાહી દરમિયાન પોલીસે ગાંજાના જથ્થા સહિત કુલ 2.42 લાખ રૂપિયાથી વધુનો મુદ્દામાલ જપ્ત કર્યો છે. ઝડપાયેલો આરોપી વાસુદેવ પાટીલ લાંબા સમયથી પોલીસને થાપ આપી રહ્યો હતો અને નવસારીના વિવિધ વિસ્તારોમાં નશીલા પદાર્થોનું નેટવર્ક ચલાવતો હોવાની શંકા છે. પોલીસ તપાસમાં સામે આવ્યું છે કે તે છૂટક વેચાણ માટે આ જથ્થો પોતાના ઘરે સંગ્રહિત કરી રાખતો હતો.
