રાજકોટ શહેરમાં માનવતા અને સંસ્કારોને લાંછન લગાવતી એક અત્યંત શરમજનક ઘટના સામે આવી છે. દીકરી સમાન નાની બાળકીની રક્ષા કરવાની જેની ઉંમર છે, તેવા એક વયોવૃદ્ધ શખ્સે માસૂમ બાળકી સાથે શારીરિક અડપલાં કરી રજવાડાંના રાજકોટ શહેરને શર્મસાર કર્યું છે. જ્યાં એક વૃદ્ધે બાળકી સાથે જાહેરમાં અડપલા કર્યા હોવાની ઘટનાથી લોકોમાં રોષ જોવા મળી રહ્યો છે.
શું છે સમગ્ર ઘટના?
આ ચોંકાવનારો કિસ્સો રાજકોટના માલવીયાનગર પોલીસ મથક વિસ્તારમાં પ્રકાશમાં આવ્યો છે. અહીં રહેતા એક વૃદ્ધે (જેને સ્થાનિક ભાષામાં ભાભા તરીકે સંબોધવામાં આવે છે) પાડોશમાં જ રહેતી એક સગીર વયની બાળકીને પોતાની હવસનો શિકાર બનાવવાનો પ્રયાસ કર્યો હતો. આ ભાભાએ બાળકી સાથે અશોભનીય શારીરિક અડપલાં કર્યા હોવાની વિગતો સામે આવી છે.
સોશિયલ મીડિયામાં વીડિયો વાયરલ થતા ખળભળાટ
આ શરમજનક કૃત્યનો વીડિયો કોઈ જાગૃત નાગરિકે ઉતારી લીધો હતો, જે બાદમાં સોશિયલ મીડિયા પર વાયરલ થયો હતો. વીડિયોમાં વૃદ્ધની હરકતો સ્પષ્ટ દેખાતી હોવાથી લોકોમાં ભારે આક્રોશ ફાટી નીકળ્યો હતો. વીડિયો વાયરલ થતાની સાથે જ સમગ્ર શહેરમાં ફિટકારની લાગણી ફેલાઈ હતી અને પોલીસ તંત્ર પણ તાત્કાલિક હરકતમાં આવ્યું હતું.
પોલીસની કડક કાર્યવાહી
ઘટનાની ગંભીરતાને સમજીને માલવીયાનગર પોલીસની ટીમે ગણતરીના કલાકોમાં જ આરોપી વૃદ્ધની ઓળખ કરી તેને ઝડપી લીધો છે. પોલીસે આ મામલે કાયદેસરની કાર્યવાહી હાથ ધરી છે. આ ઘટનાએ ફરી એકવાર સમાજમાં બાળકોની સુરક્ષાને લઈને ગંભીર પ્રશ્નો ઉભા કર્યા છે.
સમાજ માટે લાલબત્તી સમાન કિસ્સો
પાડોશમાં રહેતા અને વડીલ ગણાતા વ્યક્તિઓ દ્વારા જ્યારે આવું કૃત્ય કરવામાં આવે છે, ત્યારે સામાજિક મૂલ્યોનું પતન થતું દેખાય છે. જાગૃત નાગરિકોની સમયસૂચકતાને કારણે આ નરાધમ વૃદ્ધ જેલના સળિયા પાછળ પહોંચ્યો છે. હાલ પોલીસ આ મામલે ઊંડાણપૂર્વક તપાસ કરી રહી છે, જેથી માસૂમ બાળકીને ન્યાય મળી શકે. આવી ઘટનાથી બચાવવા તમારા બાળકોને બેડ ટચ અને ગુડ ટચની ઓળખ કરતા શીખવો.
આ પણ વાંચો - Ahmedabad News: અમદાવાદને મળી પ્રથમ મેક ઈન ઈન્ડિયા મેટ્રો, મુખ્યમંત્રી ભૂપેન્દ્ર પટેલે ટિટાગઢ રેલ સિસ્ટમ્સ પ્લાન્ટ ખાતે કર્યું સ્વાગત
