રાજકોટના કાલાવડ રોડ પર આવેલા પ્રખ્યાત 'અવધના ભૂત બંગલા' તરીકે ઓળખાતી જગ્યાએ આજે એક હૃદયદ્રાવક ઘટના બની છે. VVP એન્જિનિયરિંગ કોલેજમાં અભ્યાસ કરતો તેજસ્વી વિદ્યાર્થી ધર્મિન મોરીધરા પોતાના મિત્રો સાથે ક્રિકેટ રમવા ગયો હતો, જ્યાં બંધ સ્વિમિંગ પૂલમાં પડેલો બોલ લેવા જતાં ડૂબી જવાથી તેનું કરૂણ મોત નીપજ્યું છે.
ઘટનાની વિગત
ઘટનાની મળતી માહિતી અનુસાર, ધર્મિન આજે પોતાની કોલેજની પરીક્ષા આપીને મિત્રો સાથે ક્રિકેટ રમવા માટે અવધના ભૂત બંગલાના મેદાનમાં ગયો હતો. રમત દરમિયાન ક્રિકેટનો બોલ બાજુમાં આવેલા અને લાંબા સમયથી બંધ હાલતમાં રહેલા સ્વિમિંગ પૂલમાં પડ્યો હતો. બોલ લેવા માટે ધર્મિન પૂલમાં ઉતર્યો હતો, પરંતુ પાણીની ઊંડાઈનો અંદાજ ન આવતા તે ઊંડા પાણીમાં ગરકાવ થઈ ગયો હતો.
