સુરતના કાપડ બજારમાં જાણીતા શિવશક્તિ માર્કેટમાં ભીષણ આગ લાગ્યાને આજે એક વર્ષ જેટલો સમય વીતી ગયો છે, પરંતુ હજુ સુધી અહીંના વેપારીઓની મુશ્કેલીઓનો અંત આવ્યો નથી. માર્કેટના અસરગ્રસ્ત વેપારીઓના ધંધા-રોજગાર ઠપ થઈ ગયા છે, અને ભવિષ્ય અંગે અનિશ્ચિતતા પ્રવર્તી રહી છે.
વેપારીઓની મીટિંગમાં ગરમાગરમી
સુરતની શિવશક્તિ માર્કેટના વેપારીઓની એક મહત્વની મીટિંગ યોજાઈ હતી. આ બેઠકમાં વેપારીઓ વચ્ચે ભારે ખેંચતાણ અને ગરમાગરમીનો માહોલ જોવા મળ્યો હતો. માર્કેટના પુનઃ પ્રારંભ અંગે કોઈ સ્પષ્ટતા ન હોવાથી વેપારીઓમાં રોષ જોવા મળી રહ્યો છે. કેટલાક વેપારીઓ જલ્દી માર્કેટ શરૂ કરવા માંગે છે, જ્યારે અમુક લોકો બિલ્ડિંગની સુરક્ષાને લઈને ચિંતિત છે.
સ્ટેબિલિટી રિપોર્ટમાં ભારે વિલંબ
આ સમગ્ર વિવાદ અને વિલંબ પાછળનું મુખ્ય કારણ બિલ્ડિંગ સ્ટેબિલિટી રિપોર્ટ છે. માર્કેટની બિલ્ડિંગ આગ બાદ સુરક્ષિત છે કે નહીં, તે અંગેનો રિપોર્ટ SVNIT (સરદાર વલ્લભભાઈ નેશનલ ઇન્સ્ટિટ્યૂટ ઓફ ટેકનોલોજી) દ્વારા તૈયાર કરવાનો હતો. જોકે, એક વર્ષ વીતવા છતાં હજુ સુધી SVNIT દ્વારા આ રિપોર્ટ સોંપવામાં આવ્યો નથી. રિપોર્ટ વગર માર્કેટમાં સમારકામ કે નવેસરથી વેપાર શરૂ કરવો કાયદાકીય રીતે શક્ય નથી.
વેપારીઓ મુશ્કેલીમાં મૂકાયા
રિપોર્ટના અભાવે હજારો વેપારીઓ મૂંઝવણમાં મુકાયા છે. બેંકના હપ્તા, સ્ટાફનો પગાર અને ધંધાની અનિશ્ચિતતાને કારણે અનેક વેપારીઓ આર્થિક પાયમાલી તરફ ધકેલાઈ રહ્યા છે. હવે જોવાનું એ રહે છે કે, SVNIT દ્વારા ક્યારે રિપોર્ટ રજૂ કરવામાં આવે છે અને તંત્ર વેપારીઓના હિતમાં શું નિર્ણય લે છે.
આ પણ વાંચો - Surat મનપાના બજેટ અંગે સામાન્ય સભામાં થશે ચર્ચા, શું રહેશે મુદ્દા?
