સુરતના અમરોલી વિસ્તારમાં નોંધાયેલા કરોડો રૂપિયાના સાયબર કૌભાંડમાં તપાસનો ધમધમાટ તેજ થયો છે. સુરત પોલીસે ટેકનિકલ સર્વેલન્સ અને સઘન તપાસના આધારે આ કૌભાંડમાં સામેલ વધુ 4 આરોપીઓની ધરપકડ કરી છે. આ ટોળકી સાયબર માફિયાઓને આર્થિક ગુના કરવા માટે પ્લેટફોર્મ પૂરું પાડતી હોવાનું સામે આવ્યું છે.
કેવી રીતે ચાલતું હતું નેટવર્ક?
પકડાયેલા આરોપીઓ સામાન્ય લોકો કે શ્રમિકોના દસ્તાવેજોનો ઉપયોગ કરી વિવિધ બેંકોમાં ખાતા ખોલાવતા હતા. આ બેંક ખાતાઓ અને પર્સનલ ડોક્યુમેન્ટ્સ સાયબર માફિયાઓને ભાડે આપવામાં આવતા હતા. તપાસમાં ચોંકાવનારી વિગત બહાર આવી છે કે, આરોપીઓ એક બેંક ખાતાના ઉપયોગ બદલ ₹30,000 થી ₹50,000 સુધીની રકમ વસૂલતા હતા. આ ખાતાઓનો ઉપયોગ વિદેશથી ઓપરેટ થતા સાયબર ક્રિમિનલ્સ નાણાંની હેરાફેરી માટે કરતા હતા.
