સુરતની મોડલ સુખપ્રીત કૌર આપઘાત કેસમાં પોલીસ તપાસમાં એક મોટો અને ચોંકાવનારો ખુલાસો થયો છે. ગત 2 મે, 2025ના રોજ ગળાફાંસો ખાઈ જીવન ટૂંકાવનાર સુખપ્રીતને મરવા માટે મજબૂર કરનાર તેના 24 વર્ષીય પ્રેમી અનુરાગ જૈસ્વાલની સુરત પોલીસે મધ્યપ્રદેશથી ધરપકડ કરી છે. આરોપી અનુરાગ બી.ફાર્મનો વિદ્યાર્થી છે અને તેની પૂછપરછમાં પ્રેમ પ્રકરણ અને માનસિક ત્રાસની વિગતો સપાટી પર આવી છે.
24 વર્ષીય પ્રેમી અનુરાગ જૈસ્વાલની ધરપકડ
તપાસ દરમિયાન બહાર આવ્યું છે કે, સુખપ્રીતે આત્મહત્યા કરી તે પહેલા આરોપી અનુરાગે તેને કોન્ફરન્સ કોલ કર્યો હતો. આ કોલ દરમિયાન અનુરાગે સુખપ્રીતને અત્યંત અપશબ્દો કહી ગાળાગાળી કરી હતી, જેનાથી સુખપ્રીતને ખૂબ જ માઠું લાગ્યું હતું. આ ઉપરાંત, સુખપ્રીત જે યુવક સાથે લિવ-ઈનમાં રહેતી હતી, તેના દ્વારા પણ તેને શારીરિક અને માનસિક ત્રાસ આપવામાં આવતો હોવાનું ખુલ્યું છે. પ્રેમીના અપશબ્દો અને લિવ-ઈન પાર્ટનરના અત્યાચારથી કંટાળીને આખરે સુખપ્રીતે પંખા સાથે દુપટ્ટો બાંધી આત્મહત્યાનું અંતિમ પગલું ભર્યું હતું.
