ઉમરેઠ વિધાનસભા પેટા ચૂંટણી અંતર્ગતનું મતદાન આગામી તારીખ 23મી એપ્રિલ ગુરૂવારના રોજ સવારના 7-00 કલાકથી સાંજના 18-00 કલાક દરમિયાન યોજાવાની છે, ત્યારે જિલ્લા ચૂંટણી અધિકારી પ્રવીણ ચૌધરીના માર્ગદર્શન હેઠળ આ ચૂંટણીમાં મુક્ત અને ન્યાયી રીતે મતદાન થાય, મતદારો નિર્ભય પણે તેમના મતાધિકારનો ઉપયોગ કરી શકે અને શાંતિપૂર્ણ વાતાવરણમાં ચૂંટણી યોજાય તે માટેની તમામ તૈયારીઓ પૂર્ણ કરવામાં આવી છે, આ માટે જિલ્લા તંત્રની સાથે પોલીસ વિભાગ પણ ચૂંટણીમાં ફરજ બજાવવા માટે સંપૂર્ણ સજ્જ બન્યુ છે.
306 મતદાન મથકો ખાતે મતદાન યોજાશે
જિલ્લા પોલીસ અધિક્ષક ગૌરવ જસાણીના જણાવ્યા પ્રમાણે ઉમરેઠ વિધાનસભા મતદાર વિભાગના 306 મતદાન મથકો ખાતે મતદાન યોજાવાનું છે. આ તમામ મતદાન મથકો ખાતે ચૂસ્ત પોલીસ બંદોબસ્ત ગોઠવવામાં આવશે. આ માટે આણંદ જિલ્લામાં 03 સીઆરપીએફની કંપની ફાળવવામાં આવી છે. એટલે કે સીઆરપીએફના જવાનો મતદાન મથકો ઉપર ચાંપતી નજર રાખશે.
