ભારતીય જનતા પાર્ટીના વરિષ્ઠ નેતા અને પૂર્વ કેન્દ્રીય મંત્રી અનુરાગ ઠાકુર આગામી દિવસોમાં ગુજરાતના પ્રવાસે આવી રહ્યા છે. તેઓ વડોદરા ખાતે એક મહત્વપૂર્ણ પત્રકાર પરિષદને સંબોધશે, જેમાં કેન્દ્રીય બજેટ 2026-27ની મુખ્ય વિશેષતાઓ અને જનકલ્યાણકારી યોજનાઓ વિશે વિસ્તૃત માહિતી આપશે. કેન્દ્ર સરકારના આર્થિક વિઝનને જનતા સુધી પહોંચાડવા માટે ભાજપે આ મોટા અભિયાનની જવાબદારી તેમને સોંપી છે. વડોદરાથી થનારી આ જાહેરાત આગામી સમયમાં રાજ્યના રાજકીય અને આર્થિક સમીકરણો પર મોટી અસર પાડી શકે છે.
અનુરાગ ઠાકુર ગુજરાતની મુલાકાતે
નોંધનીય છે કે, સુપ્રીમ કોર્ટે તાજેતરમાં જ વર્ષ 2017ના આદેશમાં સુધારો કરીને અનુરાગ ઠાકુર પરનો BCCI (ભારતીય ક્રિકેટ કંટ્રોલ બોર્ડ) નો નવ વર્ષ જૂનો પ્રતિબંધ હટાવી લીધો છે. આ મોટી કાનૂની રાહત બાદ તેમનો આ પ્રથમ ગુજરાત પ્રવાસ હોવાથી રાજકીય વર્તુળોમાં ભારે ઉત્તેજના જોવા મળી રહી છે. તેઓ બજેટની સિદ્ધિઓ ગણાવવાની સાથે સાથે કાર્યકરોમાં નવો ઉત્સાહ પણ ફૂંકશે. ખાસ કરીને યુવા અને રમતગમત ક્ષેત્રે બજેટમાં કરવામાં આવેલી જોગવાઈઓ પર તેઓ વિશેષ ભાર મૂકી શકે છે.
