Vadodara News : કાર ભાડે લઇને રાજસ્થાનમાં સગેવગે કરનારા શખ્સ સામે ફરિયાદ

વડોદરા શહેરમાં કાર ભાડે લઈને તેને અન્ય રાજ્યમાં સગેવગે કરી દેવાનો એક ચોંકાવનારો બનાવ સામે આવ્યો છે. આ મામલે રાવપુરા પોલીસે ફરિયાદના આધારે આરોપી સામે ગુનો નોંધ્યો છે અને વધુ તપાસ શરૂ કરી છે.

કાર ઓળખીતાને ભાડે આપતો

મળતી માહિતી મુજબ ગોત્રી વિસ્તારમાં રહેતો નીરવ ખાનગી હોસ્પિટલમાં નોકરી કરે છે. તેણે વર્ષ 2025 દરમિયાન પોતાના મિત્ર અનિલના નામે એક કાર ખરીદી હતી. આ કાર તે ઓળખીતાઓને જરૂરી દસ્તાવેજો લઈ પ્રતિદિન રૂ.3000ના ભાડે આપતો હતો.

અતાઉરને કાર ભાડે આપી

ફરિયાદ અનુસાર 20 ફેબ્રુઆરીના રોજ કુરજીભાઈ વાળાના મારફતે કાર અતાઉર મેમનને ત્રણ દિવસ માટે ભાડે આપવામાં આવી હતી. આરોપીએ બે દિવસના ભાડા અને ડિપોઝિટ તરીકે કુલ રૂ.15,500 જમા કરાવ્યા હતા. પરંતુ ત્યારબાદ આરોપીનો સંપર્ક થઈ શક્યો નહોતો.

આજદિન સુધી કાર પરત મળી નથી

ફરિયાદી દ્વારા તપાસ કરતાં જાણવા મળ્યું કે આરોપી છેલ્લા ત્રણ વર્ષથી દર્શાવેલા સરનામે રહેતો નથી. અન્ય સરનામે તેના પરિવારજનોએ કાર પરત આપવાની ખાતરી આપી હતી, છતાં આજદિન સુધી કાર પરત મળી નથી.

પોખરણમાં કાર સગેવગે કરી

પોલીસ તપાસ દરમિયાન કારનું અંતિમ લોકેશન રાજસ્થાન હોવાનું સામે આવ્યું હતું. વધુ તપાસમાં જાણવા મળ્યું કે પોખરણ વિસ્તારમાં આશરે રૂ.8 લાખની કિંમતની કાર સગેવગે કરી દેવામાં આવી છે.આ મામલે રાવપુરા પોલીસે આરોપી સામે વિશ્વાસઘાત સહિતની કલમો હેઠળ ગુનો નોંધી વધુ તપાસ હાથ ધરી છે.

આ પણ વાંચો---    Gandhinagar : રાજ્યની મહાનગરપાલિકાઓમાં હવે વહિવટદારોનું શાસન, વર્તમાન બોર્ડની મુદત પુરી