Vadodara: નીતિ-નિયમોનો ભંગ કરનાર વાહન ડીલરો સામે RTOની કડક કાર્યવાહી, એમડી મોટર્સ અને હિરુચી મોટર્સ કાયદાના સાણસામાં..

વડોદરા RTO વિભાગે વાહન વ્યવહાર સંબંધિત નીતિ-નિયમોનો ભંગ કરનાર બે વાહન ડીલરો સામે કડક કાર્યવાહી હાથ ધરી છે. બોગસ ફિટનેસ સર્ટિફિકેટ જારી કરવાના અને નિયમ વિરુદ્ધ નવા વાહનો વેચાણ કરવાનો મામલો બહાર આવતા આર.ટી.ઓ. વિભાગે આકરાં પગલાં લીધા છે.

 એમડી મોટર્સ દ્વારા બોગસ ફિટનેસ સર્ટિફિકેટ અપાયા હતા

ઇન્ચાર્જ આર.ટી.ઓ. જે. કે. પટેલે માહિતી આપતા જણાવ્યું કે તપાસ દરમિયાન એમડી મોટર્સ દ્વારા બોગસ ફિટનેસ સર્ટિફિકેટ આપવામાં આવતા હોવાનું સામે આવ્યું હતું. આ ગંભીર ઉલ્લંઘનને પગલે વિભાગે એમડી મોટર્સનું લાયસન્સ 6 મહિનાં માટે રદ કરવાનો નિર્ણય કર્યો છે.

 હિરુચી મોટર્સમાં નવા વાહનો HSRP નંબર પ્લેટ અને હેલ્મેટ અપાતા ન હતા

તે જ સમયે, વડોદરા RTO ઇન્સ્પેક્ટર ટીમને હિરુચી મોટર્સ વાહન ડીલર અંગે મહત્વપૂર્ણ માહિતી મળી હતી. નવા વાહનો HSRP નંબર પ્લેટ અને હેલ્મેટ વગર ગ્રાહકોને વેચવામાં આવતા હોવાનો ખુલાસો થયો હતો. નીતિ-નિયમો વિરુદ્ધ ચાલતા આ પ્રકારના વેચાણને કારણે હિરુચિ મોટર્સ સામે તાત્કાલિક કાર્યવાહી કરવામાં આવી છે.

હિરુચિ મોટર્સનું Trade Certificate (TC) 7 દિવસ માટે સસ્પેન્ડ

RTO વિભાગે હિરુચિ મોટર્સનું Trade Certificate (TC) 7 દિવસ માટે સસ્પેન્ડ કર્યું છે. વિભાગના જણાવ્યા મુજબ આગળ પણ નિયમોનો ભંગ કરનાર ડીલરો સામે કડક કાર્યવાહી ચાલુ રહેશે. આ પગલાંઓથી શહેરમાં વાહન સલામતી અને પારદર્શિતા વધારવાના પ્રયાસોને વધુ ગતિ મળશે તેવી આશા વ્યક્ત કરવામાં આવી છે.

આ પણ વાંચો---  Gujarat Flashback 2025 : ગુજરાત પોલીસે સ્પેશ્યલ ડ્રાઇવ કરી ગુનેગારોમાં ફફડાટ ફેલાવ્યો હતો, 100 કલાકમાં રાષ્ટ્રવિરોધી તત્વોનું ચેકીંગ થયું હતું